Առանց Թուրքիայի միջանցք չկա․ Էրդողանը դեմ է Հնդկաստան-Մերձավոր Արևելք տրանսպորտային նախագծին

Թուրքիայի նախագահ Ռեջեփ Թայիփ Էրդողանը դեմ է հանդես եկել Հնդկաստանի, Սաուդյան Արաբիայի և ԵՄ առաջնորդների՝ առևտրային միջանցք ստեղծելու ծրագրերին, որը կկապի Հարավային Ասիան Եվրոպային և կշրջանցի Թուրքիան, գրում է Middle East Eye-ը։

«Մենք ասում ենք, որ առանց Թուրքիայի միջանցք չկա։ Թուրքիան կարևոր արտադրական և առևտրային բազա է։ Արևելքից արևմուտք շարժման ամենահարմար գիծը պետք է անցնի Թուրքիայի տարածքով»,- ասել է Էրդողանը Հնդկաստանից G20-ի գագաթնաժողովից վերադառնալիս լրագրողներին տված հարցազրույցում։

Տրանսպորտային երթուղին, որը կոչվում է Հնդկաստան-Մերձավոր Արևելք-Եվրոպա տնտեսական միջանցք (IMEC), նպատակ ունի ստեղծել երկաթուղային և նավարկություն ուղիներ, որոնք կանցնեն Արաբական Միացյալ Էմիրությունների, Սաուդյան Արաբիայի, Հորդանանի և Իսրայելի միջով, այնուհետև կհասնեն Հունաստան և Եվրոպա:

Միջանցքի վերաբերյալ փոխըմբռնման հուշագիր են ստորագրել ԵՄ-ն, Հնդկաստանը, Սաուդյան Արաբիան, ԱՄԷ-ն, ԱՄՆ-ը և G20-ի մյուս գործընկերները, որոնց թվում Թուրքիան չկա, քանի որ շրջանցում է այս երկիրը։ Ծրագրի հիմնական նպատակներից է 40 տոկոսով կրճատել բեռնափոխադրումների ժամանակը և խնայել այլ ծախսեր ու վառելիք:

Էրդողանի խոսքով՝ տեղյակ է, որ շատ երկրներ փորձում են ընդլայնել իրենց ազդեցության գոտին՝ ստեղծելով առևտրային միջանցքներ, և Թուրքիան աջակցում է Իրաքի զարգացման ճանապարհի նախագիծը, որի նպատակն է Պարսից ծոցը կապել Թուրքիայի ու Եվրոպայի հետ երկաթուղային և մայրուղու միջոցով՝ ԱՄԷ-ով, Կատարով և Իրաքով։

Նա նշել է, որ ԱՄԷ-ի նախագահ Մուհամմեդ բեն Զայեդը, մասնավորապես, «շաբաթ օրը շատ ավելի վճռական առաջարկ է արել այս հարցում»։

«Արաբական Միացյալ Էմիրությունները պատրաստ է այս աշխատանքին։ Կատարը շատ պատրաստ է։ Մենք շատ, շատ պատրաստ ենք դրան։ Հուսով եմ, որ մենք այս ճանապարհով կգնանք»,- ասել է Էրդողանը։

Զարգացման ճանապարհի նախագիծը ենթադրում է մոտ 1200 կմ երկարությամբ երկաթուղու ստեղծում և ժամանակակից մայրուղու կառուցում։ Իրաքի կառավարությունը նախատեսում է գնացքների երթևեկ, որոնք կաշխատեն ժամում մինչև 300 կիլոմետր արագությամբ։ Ծրագիրը ներառում է նաև լոգիստիկ հանգույցների, արդյունաբերական համալիրների ստեղծում և նավթի ու գազատարների հնարավոր ինտեգրում:

Նշվում է, որ այս նախագծի համար կպահանջվի շուրջ 17 միլիարդ դոլարի ներդրում։

Էմմա Չոբանյան