15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Արցախի իրավիճակի վրա ազդեցություն ունեցող 3 հիմնական գործոններ կան․ Տիգրան Աբրահամյան․ ՏԵՍԱՆՅՈՒԹ
Քաղաքականություն
12.09.2023 | 17:36
Ադրբեջանը տոտալ շրջափակման միջոցով փորձում է հասնել արցախցիների հյուծմանը՝ ակնկալելով, որ Արցախը կամ զենքերը վայր կդնի կամ այնպիսի ծանր վիճակում կհայտնվի, որ հարվածի դեպքում դիմադրելու հնարավորություն պարզապես չի ունենա։ Ազգային ժողովում այս մասին ասաց Հայաստանի ազգային ժողովի «Պատիվ ունեմ» խմբակցության քարտուղար Տիգրան Աբրահամյանը, հիշեցնելով, որ արդեն 9 ամիս է, ինչ Արցախը շրջափակման մեջ է, իսկ այնտեղ ապրող արցախցիները դժոխային կյանք են ապրում։
Պատգամավորի խոսքով՝ Արցախի պետական կառավարման համակարգը դժվարությամբ մոբիլիզացնում է իր վերջին հնարավորությունները՝ ոտքի վրա մնալու և տեղում ամենօրյա ռեժիմով ծանրացող խնդիրները մեղմելու համար։
«Շատ կարևոր եմ համարում այն հանգամանքը, որ Արցախի նոր նախագահ Սամվել Շահրամանյանը կարողացել է այս ծանր պայմաններում ներքին կայունությունը ամրապնդել ու ներսում համերաշխության մթնոլորտ ապահովել։ Եվ ամենակարևորն է ծանրագույն պահին քաղաքական ծանր որոշումներ կայացնելը։ Պակաս կարևոր չէ այն հանգամանքը, որ բոլոր առանցքային որոշումների հիմքում հասարակական, քաղաքական կոնսենսուսի ապահովումն է»,- նշեց Աբրահամյանը։
Նրա դիտարկմամբ՝ Արցախի վրա ազդեցություն ունեցող երեք հիմնական գործոններ կան, որոնց բացակայությունը պարզապես աղետի է բերելու՝ բուն Արցախի դիմադրություն, Հայաստանի գործուն սատարում և միջազգային հիմնական դերակատարների ակտիվ ազդեցություն։
«Արցախում ձևավորված իշխանությունն իր առաջնահերթություններով և օրակարգով ֆիքսել է, որ առաջ է ընթանալու ինքնորոշման իրավունքի իրացման ու դրա միջազգային ճանաչման ճանապարհով։ Պայքարի այս հանգրվանում է ստացել քաղաքական լուրջ աջակցություն և իր քաղաքական կուրսը կառուցել այս հիմքով։
Միջազգային հանրությունը գործում է հատվածական՝ հիմքում ունենալով տարածաշրջանում ազդեցության կատաղի պայքարը, շատ ժամանակ շարժվելով այն իրողություններով, որոնք օբյեկտիվորեն ձևավորվել են, իսկ հետևանքն այն է, որ Ադրբեջանը հրապարակային հայտարարում է, թե Հայաստանի ու Արցախի հետ հարաբերություններում իր համար գերիշխողը ուժերի դիրքերից հանդես գալն է»,- եզրափակեց Աբրահամյանը։
Մանրամասները՝ տեսանյութում։
