Արցախի հետ հարաբերություններն ամրացնելու փոխարեն, ՀՀ իշխանությունները գնացին ինքնաօտարման ճանապարհով․ Արթուր Խաչատրյան․ ՏԵՍԱՆՅՈՒԹ

44-օրյա պատերազմում կրած պարտությունից հետո իր պատմական հայրենիքում ինքնորոշված արցախահայությունը կանգնած է ցեղասպանության, իսկ հայ ազգը՝ պատմական հայրենիքի մի մասնիկի կորստի վտանգի առաջ։ ԱԺ հայտարարությունների ժամին ասաց «Հայաստան» խմբակցության պատգամավոր Արթուր Խաչատրյանը:

«Թվում էր, թե Հայաստանը պետք է ամեն քայլ ձեռնարկեր՝ ավելի սերտացնելու հայկական երկու պետությունների միջև կապերը, դարմանելու վիրավոր Արցախի վերքերը և դիմագրավելու լկտիացած Ադրբեջանի նոր սպառնալիքներին»,- նշեց Խաչատրյանը:

Պատգամավորի խոսքով` Ադրբեջանը հասկացել է, որ ՀՀ իշխանությունը Արցախին մենակ է թողել և բորենիների ոհմակի պես հարձակվել է մեր հայրենակիցների վրա՝ շրջափակելով Արցախը։

«Իսկ ի՞նչ արեց Հայաստանը․ 2023թ․ մայիսին վերահաստատեց, որ ճանաչում է Ադրբեջանի ամբողջականությունը՝ 86 հազար 600 քմ։ Փոխանակ ընդունելու սեփական ձախողումները, գիտակցելով, որ սխալ ճանապարհով են շարժվում, ՀՀ իշխանությունները փորձում են ժամանակի և տարածության մեջ մեղավորներ գտնել։

Հայաստանի բազմադարյան պատմության մեջ միայն հայ բոլշևիկներն ու ՔՊ-ն են կասկած տակ դնում Արցախի հայկականությունը»,- նշեց պատգամավորը:

Խաչատրյանը հայտարարեց, որ Նիկոլ Փաշինյանը երեկ հարված հասցրեց Արցախի թիկունքին` Արցախի նորընտիր նախագահին կոչելով «Լեռնային Ղարաբաղի առաջնորդ»:

«Չեմ զարմանա, որ վաղը նա, տեղիք տալով Ադրբեջանի պահանջին, Արցախի նախագահին կոչի «Ղարաբաղի հայ համայնքի ներկայացուցիչ»,- ընդգծեց «Հայաստան» խմբակցության պատգամավորը:

Մանրամասները՝ տեսանյութում։