24.11.2024 | 10:17
Հրդեհ ավտոտնակում․ այրվել է երկու ավտոմեքենա
ԱՄՆ-ն ապասառեցնում է Իրանի 6 միլիարդ դոլարի չափով ակտիվները
Քաղաքականություն
12.09.2023 | 13:41
ԱՄՆ պետքարտուղար Էնթոնի Բլինքենը գործադիր հրաման է արձակել, որով թույլատրվում է 6 միլիարդ դոլարի սառեցված իրանական ակտիվները Հարավային Կորեայից փոխանցել Կատար՝ ԱՄՆ-ի և Իրանի միջև գերիների փոխանակման գործարքի շրջանակում: Այս մասին գրում է Reuters-ը՝ վկայակոչելով ԱՄՆ Կոնգրեսի ստացած ծանուցումը։
Վաշինգտոնի և Թեհրանի միջև համաձայնագրի ընդհանուր պայմանները, որոնց համաձայն Իրանի կողմից կալանավորված ԱՄՆ հինգ քաղաքացիներին թույլատրվում է լքել երկիրը՝ դրամական միջոցների փոխանցման և ԱՄՆ-ում պահվող հինգ իրանցիների ազատ արձակման դիմաց, հրապարակվել են օգոստոսին 10-ին, հիշեցնում է Reuters-ը։
Առաջին անգամ է, երբ ԱՄՆ պաշտոնյաները պաշտոնապես հաստատում են, որ ազատ են արձակում հինգ իրանցիների՝ իրենց քաղաքացիներին Իրանում բանտարկությունից ազատելու գործարքի շրջանակում: Փաստաթղթում նշվում է, որ փոխանցված միջոցները հասանելի կլինեն Իրանին բացառապես մարդասիրական նպատակներով ծախսելու համար։ Բանակցություններին ծանոթ Reuters-ի ութ աղբյուրները հայտնել են, որ 6 միլիարդ դոլարի չափով փոխանցումը և բանտարկյալների փոխանակումը կարող է տեղի ունենալ հաջորդ շաբաթ։
Իրանը դեռևս օգոստոսին Թեհրանի բանտից տնային կալանքի էր տեղափոխել ԱՄՆ չորս քաղաքացու։ Բլինքենը դա անվանել էր գործընթացի սկիզբ, որը կհանգեցնի նրանց տուն վերադարձին: Նրանց թվում, ում ԱՄՆ-ը նախատեսում է վերադարձնել Իրանից, ներառված են գործարարներ Սիամաք Նամազին և Էմադ Շարքին, ինչպես նաև բնապահպան Մորադ Թահբազը, գրում է Reuters-ը։
