ՌԴ-ում ուղևորատար ինքնաթիռը հարկադիր վայրէջք է կատարել դաշտում

Սոչիից Օմսկ թռչող Ural Airlines ավիաընկերության Airbus A320 ինքնաթիռը չի կարողացել վայրէջք կատարել Օմսկի օդանավակայանում և հարկադիր վայրէջք է կատարել Նովոսիբիրսկի շրջանի դաշտերից մեկում։ Ինքնաթիռում եղել է շուրջ 170 մարդ, նրանցից ոչ ոք վայրէջքի հետևանքով չի տուժել։

Ինքնաթիռը տագնապի ազդանշան է տվել, որից հետո օդանավն ուղարկվել է Նովոսիբիրսկի այլընտրանքային օդանավակայան, հայտնում է ՏԱՍՍ-ը ։

«Ուրալյան ավիաուղիների» ինքնաթիռը չի հասել օդանավակայան և տեղական ժամանակով ժամը 09:44-ին (Մոսկվայի հետ տարբերությունը չորս ժամ է) «վթարային վայրէջք է կատարել գետնին», – գրել է Նովոսիբիրսկի մարզի նահանգապետ Անդրեյ Տրավնիկովը Telegram-ի իր ալիքում։

Ինքնաթիռը խնդիրներ է ունեցել հիդրավլիկայի հետ, մտավախություններ են առաջացել, որ այլընտրանքային օդանավակայանում վայրէջք կատարելիս կարող են արգելակները խափանվել, գրում է ՏԱՍՍ-ը։ Օմսկի մարզի նահանգապետ Վիտալի Խոցենկոն նույնպես հայտնել է, որ A320-ը «կորցրել է իր հիդրավլիկ համակարգը»:

Ըստ իշխանությունների՝ դաշտում վայրէջքն այնքան հաջող է անցել, որ ոչ ոք չի տուժել՝ բացառությամբ մեկ մարդու, որն օգնության կարիք է ունեցել արյան բարձր ճնշման պատճառով: Հրապարակված տեսանյութերում երևում է, թե ինչպես են ուղեւորները զվարթ տրամադրությամբ ու գրեթե կատակելով դաշտով քայլում։

Թե քանի մարդ է եղել ինքնաթիռում, տվյալները տարբեր են: «Ռոսավիացիան» հաղորդել է 159 ուղևորի և անձնակազմի 6 անդամների մասին, Նովոսիբիրսկի ԱԻՆ վարչությունը հայտնել է, որ ինքնաթիռում եղել է 167 մարդ, Նովոսիբիրսկի մարզի նահանգապետը գրել է, որ վթարից փրկված ինքնաթիռում եղել է 170 մարդ, այդ թվում՝ 23 երեխա։