Էրդողանը հայտնել է, որ պատրաստվում է հեռախոսազրույց ունենալ Պուտինի հետ

Թուրքիան կշարունակի ակտիվ դերակատարում ունենալ այն հարցերում, որոնք վերաբերում են ամբողջ աշխարհին։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Նյու Դելիում G20-ի գագաթնաժողովից վերադառնալիս ինքնաթիռում լրագրողների հետ զրույցում, գրում են թուրքական լրատվամիջոցները։

Նա նշել է, որ G20-ը հաջողությամբ կատարել է իր դերը և ապացուցել արդյունավետությունը բազմաթիվ խնդիրների լուծման գործում։

Մեկնաբանելով Սևծովյան հացահատիկային գործարքի ապագան՝ Էրդողանն ասել է, որ Սոչի կատարած իր վերջին այցի ժամանակ այդ հարցը մանրամասն քննարկվել է ՌԴ նախագահ Վլադիմիր Պուտինի հետ, մասնավորապես՝ աֆրիկյան երկրներ հացահատիկ ուղարկելու համատեքստում։

«Պուտինն ասաց, որ Արևմուտքը չի կատարել իր խոստումները։ Նա նշեց, որ առաջին փուլում առաքելու է 1 մլն տոննա հացահատիկ։ Մասնավորապես, ՌԴ արտգործնախարար Սերգեյ Լավրովի հետ հանդիպմանը խոսվել է աֆրիկյան աղքատ երկրներ 1 մլն տոննա հացահատիկ ուղարկելու մասին՝ Կատարի, Թուրքիայի և Ռուսաստանի մասնակցությամբ։ Մենք քայլեր կձեռնարկենք իրավիճակը վերանայելու համար»,- ասել է Էրդողանը։

Նա նշել է, որ Լավրովն իրեն առաջարկել է հացահատիկի ծավալների թեման կրկին քննարկել Պուտինի հետ։

«Ես ևս մեկ անգամ կքննարկեմ հարցը հեռախոսով պարոն Պուտինի հետ, օգտակար կլինի օժանդակել Աֆրիկայի ամենաթույլ զարգացած երկրներին՝ ավելացնելով այդ ծավալը։ Հավատում եմ, որ յուրաքանչյուր հանդիպում իր շահավետ արդյունքները կբերի ինչպես Թուրքիայի, այնպես էլ ողջ մարդկության համար»,- հայտարարել է Էրդողանը։

Էմմա Չոբանյան