30.05.2026 | 19:53
«Յունիսպորտը»` ֆուտզալի Հայաստանի չեմպիոն. ՏԵՍԱՆՅՈՒԹ
Կիևը վերականգնել է Սև ծովում նավթային ու գազային հարթակների նկատմամբ վերահսկողությունը․ Ուկրաինայի ԶՈւ
Քաղաքականություն
11.09.2023 | 21:37
Ուկրաինան իր վերահսկողությանն է վերադարձրել Սև ծովում նավթի և գազի հորատման հարթակները, որոնք հայտնի են որպես «Բոյկո աշտարակներ»։ Այս մասին տեղեկացրել է Ուկրաինայի Պաշտպանության նախարարության գլխավոր հետախուզական վարչության մամուլի ծառայությունը, փոխանցում է Meduza-ն։
Ուկրաինայի ԶՈւ ստորաբաժանումների կողմից իրականացված գործողության ընթացքում Ուկրաինային հաջողվել է վերականգնել վերահսկողությունը «Պիտեր Գոդովանեց» և «Ուկրաինա» հորատման հարթակների, ինչպես նաև «Տավրիդա» և «Սիվաշ» լողացող հորատման հարթակների նկատմամբ։
Հետախուզությունը պարզաբանում է, որ գործողության փուլերից մեկի ժամանակ Ուկրաինայի ԶՈւ-ի հատուկ ջոկատայինները նավակների վրա մարտի մեջ են մտել ռուսական Սու-30 կործանիչի հետ։ Ուկրաինական ռազմական հետախուզության տվյալներով՝ ռուսական ինքնաթիռը վնասվել է և ստիպված է եղել նահանջել։
Գերատեսչությունը նաև նշել է, որ հատուկ ջոկատայիններին հաջողվել է գրավել չկառավարվող ինքնաթիռների հրթիռների պաշար և Նևայի ռադիոլոկացիոն կայանը, որը կարող է հետևել նավերի շարժին Սև ծովում։
ՌԴ իշխանությունները չեն մեկնաբանել Ուկրաինայի հետախուզության զեկույցը։
Ռուսաստանը «Բոյկո աշտարակները» գրավել էր 2014 թվականին։ 2023-ի օգոստոսի երկրորդ կեսից ՌԴ Պաշտպանության նախարարությունը բազմիցս հայտարարել է Սև ծովում Ուկրաինայի զինված ուժերի դեսանտային խմբեր տեղափոխող արագընթաց նավակների ոչնչացման մասին։
Միևնույն ժամանակ, բրիտանական հետախուզությունը հայտնել է, որ Ռուսաստանը և Ուկրաինան մարտչնում են «Բոյկո աշտարակների» համար։ Այս հարթակները, ըստ բրիտանական պաշտպանական կառույցի, ունեն ռազմավարական նշանակություն, քանի որ դրանք կարող են օգտագործվել որպես ուղղաթիռների վայրէջքի հարթակներ, որպես հենակետեր, ինչպես նաև կարող են տեղակայել հրթիռային համակարգեր:
