Քաղաքականություն
08.09.2023 | 16:42
Նյու Յորքի քաղաքապետ Էրիկ Ադամսը հայտարարել է, որ միգրանտների ճգնաժամը կկործանի քաղաքը։ Նա ասել է, որ 2022 թվականի ապրիլից ի վեր Նյու Յորքով անցել է 110 հազար ապաստան հայցող, և այս խնդիրը հանգեցրել է բյուջեի 12 միլիարդ դոլարի դեֆիցիտի։
Ադամսի խոսքով՝ նախկինում ապաստան հայցողները գալիս էին Վենեսուելայից, այժմ՝ Էկվադորից։ Բացի այդ, Մեքսիկայով քաղաք են ժամանում ռուսախոս քաղաքացիներ, ինչպես նաև միգրանտներ Արևմտյան Աֆրիկայից։
«Եվ թույլ տվեք ձեզ մի բան ասել, նյույորքցիներ, ես իմ կյանքում երբեք խնդիր չեմ ունեցել, որի վերջը չտեսնեի, բայց ես սրա վերջը չեմ տեսնում: Այս խնդիրը կկործանի Նյու Յորքը»,- Ադամսի խոսքերն է մեջբերում ABC-ն։
2021 և 2022 թվականներին միգրանտների հոսքը ԱՄՆ ռեկորդ է սահմանել՝ գերազանցելով 2,3 միլիոնը։ Անցած ապրիլին Մեքսիկայից ԱՄՆ ապօրինի միգրանտների հոսքը հասել է վերջին 22 տարվա առավելագույնին։ Վաշինգտոնում արտակարգ դրություն է հայտարարվել. ԱՄՆ իշխանությունները հայտնել են, որ 2023 ֆինանսական տարվա սկզբից արդեն երկիր է ժամանել ավելի քան 1,2 միլիոն միգրանտ։
