ԱՄՆ-ը և Մեծ Բրիտանիան պատժամիջոցներ են սահմանել ՌԴ հաքերների դեմ

ԱՄՆ Ֆինանսների նախարարությունը պատժամիջոցներ է սահմանել 11 ռուսաստանցիների նկատմամբ, որոնց Վաշինգտոնը համարում է Trickbot հաքերային խմբավորման անդամներ, գրում է DW-ի ռուսական ծառայությունը։

Սահմանափակումները ենթադրում են ԱՄՆ-ում պատժամիջոցների ցանկում հայտնված անձանց ակտիվների սառեցում  և ամերիկյան քաղաքացիների կամ ընկերությունների համար այդ անձանց հետ բիզնես վարելու արգելք։

Նախօրեին Մեծ Բրիտանիայի կառավարությունը ևս նման միջոցներ էր սահմանել։

«Ռուսաստանը երկար ժամանակ հանդիսանում է անվտանգ ապաստարան կիբերհանցագործների համար»,- ասվում է ԱՄՆ Ֆինանսների նախարարության հայտարարության մեջ։

Դրա համաձայն՝ Trickbot-ը կապված է ռուսական հետախուզական ծառայությունների հետ և հարձակվել է ամերիկյան կառավարության ու ընկերությունների, ինչպես նաև կարևոր ենթակառուցվածքների և առողջապահական ծառայությունների մատակարարների վրա։ Ըստ ամերիկյան կողմի՝ խմբավորումը հանդիսանում է համանուն վիրուսի մշակողը, որը ստեղծվել է Ռուսաստանի սահմաններից դուրս գտնվող թիրախներից ֆինանսական տվյալներ գողանալու նպատակով։

ԱՄՆ ֆինանսների փոխնախարար Բրայան Նելսոնն ասել է, որ Վաշինգտոնը, համաձայնեցնելով Լոնդոնի հետ, կշարունակի օգտագործել կոլեկտիվ գործիքներն ու լիազորությունները՝ վնասակար կիբերգործունեության դեմ պայքարելու համար։

Մեծ Բրիտանիան ևս Trickbot-ի կիբերհանցագործներին մեղադրել է կարևոր ենթակառուցվածքների վրա հարձակումների մեջ: Բացի այդ, հաքերները սպառնացել են Ուկրաինա ռուսական ռազմական ներխուժման հակառակորդներին։

Հանցագործության դեմ պայքարի ազգային գործակալությունը գնահատում է, որ Trickbot-ը ներգրավված է առնվազն 180 միլիոն ԱՄՆ դոլարի (168 միլիոն եվրո) շորթման մեջ ամբողջ աշխարհում և առնվազն 27 միլիոն ֆունտ սթերլինգի (31,4 միլիոն եվրո)՝ Մեծ Բրիտանիայում։

ԱՄՆ-ում ՌԴ դեսպան Անատոլի Անտոնովը նման պատժամիջոցներն անվանել է «հիբրիդային պատերազմի տարր», իսկ Մեծ Բրիտանիայում Ռուսաստանի դեսպանատունը տարակուսանք է հայտնել Լոնդոնի որոշման կապակցությամբ։

Էմմա Չոբանյան