06.12.2025 | 19:41
ԿԳՄՍ նախարարությունը մեկնարկել է վորկաութի և առողջ ապրելակերպի խթանման ծրագիր
Արարատ Միրզոյանն ու ԱՄՆ պետքարտուղարի տեղակալի պաշտոնակատարը քննարկել են տարածաշրջանային անվտանգության հարցեր, իրավիճակը Լեռնային Ղարաբաղում
Քաղաքականություն
08.09.2023 | 11:09
Սպտեմբերի 7-ին ՀՀ արտաքին գործերի նախարար Արարատ Միրզոյանը հեռախոսազրույց է ունեցել ԱՄՆ պետքարտուղարի եվրոպական և եվրասիական հարցերով տեղակալի պաշտոնակատար Յուրի Քիմի հետ․ տեղեկացնում են ՀՀ ԱԳՆ-ից։
Քննարկվել են տարածաշրջանային անվտանգության հարցեր, իրավիճակը Լեռնային Ղարաբաղում։
ԱԳ նախարար Արարատ Միրզոյանը վերահաստատել է 2020թ. նոյեմբերի 9-ի հայտարարության և Արդարադատության միջազգային դատարանի երկու որոշումների համաձայն Ադրբեջանի կողմից Լաչինի միջանցքի ապօրինի արգելափակման վերացման անհրաժեշտությունը։ Ընդգծվել է Կարմիր խաչի միջազգային կոմիտեի` ԼՂ անխափան մուտքի և մարդասիրական գործունեության ապահովման կարևորությունը։
Նախարար Միրզոյանը հանգամանալից անդրադարձ է կատարել Ադրբեջանի կողմից այս ընթացքում իրականացվող ապակառուցողական վարքագծին, իր իսկ կողմից ստանձնած պարտավորություններին և միջազգային հանրության հստակ կոչերին անարգանքին, ԼՂ-ում էթնիկ զտումներ իրականացնելու համակարգային քաղաքականությանը։ Ընդգծվել է Ստեփանակերտի և Բաքվի միջև իրավունքների և անվտանգության երաշխիքների շուրջ քննարկումների համար միջազգային գործուն մեխանիզմի ներդրման անհրաժեշտությունը։
Անդրադարձ է կատարվել երկկողմ համագործակցության օրակարգի։
Յուրի Քիմն իր հերթին X-ում գրառմամբ տեղեկացրել է, որ հեռախոսազրույց է ունեցել Արարատ Միրզոյանի հետ ու հայտնել Լեռնային Ղարաբաղում հումանիտար իրավիճակի հետ կապված ԱՄՆ-ի լուրջ մտահոգությունները։
«Հայաստանի արտգործնախարար Արարատ Միրզոյանի հետ այսօր զրուցել եմ Լեռնային Ղարաբաղում հումանիտար իրավիճակի հետ կապված մեր լուրջ մտահոգությունների մասին։ Մենք կոչ ենք անում բոլոր կողմերին համագործակցել՝ անհապաղ և միաժամանակ բացելու Լաչինն ու այլ երթուղիներ՝ հուսահատորեն անհրաժեշտ մարդասիրական մատակարարումները Լեռնային Ղարաբաղ հասցնելու համար»,- գրել է ամերիկացի պաշտոնյան։
