Թուրքիան պետք է ժողովրդավարական բարեփոխումներ ձեռնարկի` ԵՄ-ին անդամակցության հայտը վերակենդանացնելու համար․ ԵՄ հանձնակատարը՝ Ֆիդանին

ԵՄ Հարևանության և ընդլայնման հարցերով հանձնակատար Օլիվեր Վարհեիին նախօրեին Անկարային փոխանցել է, որ Թուրքիան պետք է ժողովրդավարական բարեփոխումներ իրականացնի, որպեսզի վերակենդանացնի դաշինքին միանալու՝ տասնամյակներ ձգձգված անդամակցության հայտը, գրում է Al Monitor-ը։

Վարհեիին Թուրքիայում հանդիպելու է տարբեր պաշտոնյաների, նաև բանակցություններ անցկացրել ԱԳ նախարար Հաքան Ֆիդանի հետ այն բանից հետո, երբ երկրի նախագահ Ռեջեփ Թայիփ Էրդողանը ԵՄ-ին անդամակցության՝ փակուղում գտնվող հարցը քննարկել էր ՆԱՏՕ-ին Շվեդիայի անդամակցությանը համաձայնություն տալու դիմաց:

Ֆիդանի հետ մամուլի ասուլիսում Վարհեիին հիշեցրել է, որ Անկարայի և Բրյուսելի միջև անդամակցության բանակցությունները 2018 թվականից ի վեր «փակուղում» են։

«Վերամոբիլիզացիայի համար կան շատ հստակ չափանիշներ, որոնք սահմանված են Եվրոպական խորհրդի կողմից, և որոնք պետք է իրականացվեն: Այս չափանիշները կապված են ժողովրդավարության և օրենքի գերակայության հետ»,- լրագրողներին ասել է Վարհեիին։

Նա նաև նշել է, որ Անկարայի համոզիչ ճանապարհային քարտեզը, որը փորձում է լուծել այդ խնդիրները, կարող է կրկին բացել Թուրքիայի անդամակցության բանավեճը Անկարայի հետ հարաբերությունները վերականգնել ձգտող առաջնորդների միջև:

Եվրահանձնաժողովը 2018 թվականին հայտարարել էր, որ դաշինքին Թուրքիայի լիիրավ անդամակցության բանակցությունները փակուղի են մտել երկրում մարդու իրավունքների խախտման, օրենքի գերակայության հետ կապված վատ վիճակի, ինչպես նաև Անկարայի և ԵՄ անդամ երկրների Հունաստանի ու Կիպրոսի միջև լարվածության պատճառով:

Ֆիդանն իր հերթին ասել է, որ իր կառավարությունն ակտիվացրել է ջանքերը դաշինքի հետ հարաբերությունների ընթացքը փոխելու ուղղությամբ՝ վերահաստատելով  կառավարության վճռականությունը Թուրքիայի՝ ԵՄ անդամակցության դադարեցված բանակցությունների հարցում, որոնք սկսվել են 2015 թվականին։

«Այն ժամանակ, երբ ընդլայնման քաղաքականությունը վերադարձել է ԵՄ օրակարգ՝ աշխարհաքաղաքական մտահոգությունների պատճառով, Թուրքիային այս գործընթացից դուրս թողնելը մեծ ռազմավարական սխալ կլինի»,- ասել է Թուրքիայի ԱԳ նախարարը։

Նա նշել է, որ կողմերը պայմանավորվել են կարճ և միջնաժամկետ քայլերի շրջանակի շուրջ, որոնք կարող են ձեռնարկվել որպես Անկարայի և Բրյուսելի միջև կապերը վերականգնելու ջանքերի մաս:

Մարդու իրավունքների եվրոպական դատարանին ենթարկվելու՝ Թուրքիայի մերժումը ԵՄ-ին Անկարայի արգելափակված հայտը վերականգնելու ցանկացած փորձի գլխավոր խոչընդոտներից մեկն է։

Էմմա Չոբանյան