Երևանի ավագանու առաջիկա ընտրություններին «Հիմնադիր խորհրդարանը» ևս կմասնակցի․ Կարո Եղնուկյան

Երեկ Երևանի ավագանու նիստում քաղաքապետի միակ թեկնածուն՝ «Երկիր Ծիրանի» խմբակցության ղեկավար Զարուհի Փոստանջյանը չընտրվեց․ քվորում չապահովվեց։ Սա նշանակում է, որ Կառավարությունը կլուծարի ավագանին և կնշանակվի արտահերթ ընտրություն։

Արդեն իսկ մի շարք քաղաքական ուժեր հայտարարել են, որ կմասնակցեն արտահերթ ընտրություններին։ Մասնավորապես, այդ մասին հայտարարել են «Ելք»-ը, «Ծառուկյան» դաշինքը, «Ժառանգություն» կուսակցությունը։

Factor.am-ը փորձեց ճշտել, թե ինչ դիրքորոշում ունի «Հիմնադիր խորհրդարանը» սպասվող ընտրությունների վերաբերյալ։ Զրուցել ենք «Հիմնադիր խորհրդարանի» անդամ Կարո Եղնուկյանի հետ․

-Պարո՛ն Եղնուկյան, «Հիմնադիր խորհրդարանում» քննարկում եղել է՝ կմասնակցե՞ք ավագանու առաջիկա ընտրություններին, թե՞ ոչ։

-Որ մասնակցություն ունենալու ենք, դա որոշված է, բայց թե ինչ ձևաչափով և ավելի մանրամասները դեռ քննարկված չեն։

-Իսկ քննարկե՞լ եք քաղաքապետի թեկնածուի հարցը, որևէ մեկին կառաջադրե՞ք, թե՞ կաջակցեք այլ կուսակցության թեկնածուի։

-Այդ մասին քննարկում չի եղել։ Ես չեմ կարծում, որ մենք քաղաքապետի թեկնածուի համար պատրաստ ենք։ Մեր պայմանը խորհրդարանական ընտրություններին մասնակցելու մասին է, և դա պայմանավորված է նրանով, որ բոլոր քաղբանտարկյալները պիտի ազատ արձակվեն և որից հետո նոր պիտի պատրաստվենք։

-Իսկ ի՞նչ տեսակետ ունեք Երևանի քաղաքապետի հրաժարականի վերաբերյալ։

-Ես կասեի՝ մի քանի տարով ուշացած հրաժարական էր, բայց ավելի լավ է ուշ, քան երբեք։

Լիլիթ Շաբոյան։