ԵՄ-ն ներկայումս չի դիտարկում Ադրբեջանի հետ ստորագրված Էներգետիկայի վերաբերյալ փոխըմբռնման հուշագրի կասեցումը․ Բորել

ԵՄ արտաքին արաբերությունների ու անվտագնային հարցերով բարձր ներկայացուցիչ Ժոզեպ Բորելն անդրադարձել է Արցախում տիրող հումանիտար ճգնաժամին։

Բորելի հայտարարության մեջ ասվում է, որ Հայաստանի և Ադրբեջանի հարաբերությունների խնդիրը որպես առանձին օրակարգ քննարկվել է 2023 թվականի հունիսի 26-ին Արտաքին հարաբերությունների խորհրդում, որտեղ Բարձր ներկայացուցիչը ներկայացրել է Լաչինի միջանցքի գրեթե լիակատար արգելափակման հետևանքով իրավիճակի վատթարացման ընդհանուր պատկերը։ Նա արտաքին գործերի նախարարներին զգուշացրել է հումանիտար ճգնաժամի վտանգի մասին և փոխանցել Եվրախորհրդարանի՝ Ադրբեջանի դեմ պատժամիջոցներ կիրառելու կոչը։

Նշվում է, որ ԵՄ-ն 2022 թվականի դեկտեմբերի սկզբից ուշադիր հետևում է Լաչինի միջանցքում ու դրա շուրջ զարգացումներին, ինչպես նաև դրանց հումանիտար հետևանքներին։ ԵՄ-ն բազմիցս կոչ է արել բացել միջանցքը և շարունակում է ակտիվորեն ներգրավված լինել ամենաբարձր մակարդակով՝ օգնելով Հայաստանին և Ադրբեջանին աշխատել փոխադարձ ընդունելի հարաբերությունների կարգավորման ուղղությամբ:

«Այս առումով, ներկայումս չի դիտարկվում Ադրբեջանի հետ 2022 թվականի հուլիսի 18-ին ստորագրված Էներգետիկայի վերաբերյալ փոխըմբռնման հուշագրի կասեցումը, որը ԵՄ-ի՝ էներգիայի աղբյուրները դիվերսիֆիկացնելու ջանքերի մի մասն է: Սակայն, ԵՄ-ն կշարունակի Բաքվի վրա ազդել Լեռնային Ղարաբաղում հումանիտար իրավիճակի հրատապ լուծման անհրաժեշտության վրա, և որ դա պատշաճ կերպով չկատարելը կարող է գործնական ազդեցություն ունենալ ԵՄ-ի հետ հարաբերությունների վրա»,-ասվում է Բորելի հայտարարության մեջ։