07.10.2026 | 23:48
Արթուր Դանիելյանը կալանավորվեց
2022 թվականին կասետային ռումբերից տուժել է 1172 մարդ
Քաղաքականություն
05.09.2023 | 16:29
Մարդասիրական կազմակերպություններն աշխարհում կասետային զինամթերքից զոհերի աճ են գրանցել։ 2022 թվականին 1172 մարդ վիրավորվել կամ սպանվել է այս արգելված զենքի պատճառով, ինչն ամենաբարձր ցուցանիշն է 2010 թվականի տարեկան զեկույցների մեկնարկից ի վեր, հայտարարել են Ժնևում հակահետևակային ականների և կասետային զինամթերքի արգելման միջազգային արշավի (ICBL-CMC) ներկայացուցիչները, գրում է DW-ի ռուսական ծառայությունը:
2022 թվականի բարձր ցուցանիշը հիմնականում պայմանավորված է Ուկրաինայում կասետային զինամթերքի կիրառմամբ, ասվում է համապատասխան զեկույցում։
Բացի այդ, նախորդ տարի նման արկերից վիրավորվելու կամ մահվան դեպքեր են գրանցվել Իրաքում, Եմենում, Լաոսում, Լիբանանում, Մյանմարում, Սիրիայում։ Բոլոր դեպքերի 95 տոկոսը վերաբերում է խաղաղ բնակչությանը, նշել են կազմակերպությունից։
Կասետային զինամթերքի զոհերի մեծ մասը գրանցված է Ուկրաինայում, որտեղ դրանցից տուժել է 890 մարդ։ Սա վկայում է, առաջին հերթին, Ռուսաստանի կողմից արգելված արկերի լայն տարածման մասին, վստահ են ICBL-CMC փորձագետները։
Նրանք հիշեցնում են, որ կասետային զինամթերք է օգտագործվել Ռուսաստանի Դաշնության և Ուկրաինայի զինված ուժերի դեմ ռազմական գործողություններում։ Կիևին նման ռումբեր մատակարարելու՝ ԱՄՆ վարչակազմի որոշումը, որն ընդունվել է 2023 թվականի հուլիսին, «վտանգավոր նախադեպ է», համոզված է ICBL-CMC-ն։
Կազմակերպությունը կոչ է արել համաշխարհային հանրությանը «համակարգված դատապարտել այս բարբարոսական զենքի կիրառումը և պատասխանատվության ենթարկել դրանց կիրառման համար պատասխանատուներին»:
