16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
Բաց ենք այդ հարցի շուրջ բանակցությունների համար․ Պուտինը՝ Էրդողանի հետ հացահատիկային գործարքը քննարկելու մասին
Քաղաքականություն
04.09.2023 | 16:13
Մոսկվայի և Անկարայի միջև առևտրաշրջանառությունն անցյալ տարի աճել է 86 տոկոսով, այս տարի դրական միտումը շարունակվում է։ Այս մասին հայտարարել է Ռուսաստանի նախագահ Վլադիմիր Պուտինը Սոչիում Թուրքիայի նախագահ Ռեջեփ Թայիփ Էրդողանի հետ հանդիպմանը։
«Ձեր անմիջական մասնակցությամբ Ռուսաստանի և Թուրքիայի միջև հարաբերությունների զարգացման տեմպերը պահպանվում են: Ցանկանում եմ Ձեր ուշադրությունը հրավիրել այն փաստի վրա, որ անցյալ տարի մեր ապրանքաշրջանառությունն աճել է 86 տոկոսով։ Ընթացիկ տարվա առաջին կիսամյակում դրական միտումը շարունակվում է»,- ասել է ՌԴ ղեկավարը։
Պուտինը նաև հայտնել է, որ մտադիր է Էրդողանի հետ քննարկել իրավիճակը Սիրիայում, Ուկրաինայում, ինչպես նաև հացահատիկային գործարքը։
«Իհարկե, մենք չենք անտեսի ուկրաինական ճգնաժամի հետ կապված հարցերը: Ես գիտեմ, որ Դուք մտադիր եք բարձրացնել հացահատիկի գործարքի հարցը, մենք բաց ենք այդ հարցի շուրջ բանակցությունների համար»,- ասել է Պուտինը։
Նա նաև նշել է, որ երկուսով շատ բան են արել Սիրիայում իրավիճակի կարգավորման համար։ Պուտինը չի մոռացել նաև Թուրքիայում գազային հանգույցի ստեղծման թեման։
«Մենք առաջընթաց ենք գրանցել, և հուսով եմ, որ առաջիկայում կավարտենք բանակցությունները Թուրքիայում գազային հանգույցի ստեղծման շուրջ՝ տարածաշրջանում էներգետիկ իրավիճակն ավելի կայուն և հավասարակշռված դարձնելու համար»,- հայտարարել է ՌԴ նախագահը։
Էմմա Չոբանյան
