Սիրիայում Թուրքիայի աջակցությունը վայելող զինյալների և կառավարական բանակի միջև բախումները 23 մարդու կյանք են խլել

Սիրիայի հյուսիս-արևելքում քրդերի կողմից վերահսկվող տարածքներում բախումներ են տեղի ունեցել կառավարական բանակի և Թուրքիայի աջակցությունը վայելող զինված խմբավորումների միջև, որոնց հետևանքով 23 մարդ է զոհվել։ Բախումներ տեղի են ունեցել, երբ Անկարայի կողմից աջակցվող ապստամբները փորձել են ներթափանցել սիրիական տարածք, գրում է Turkish Minute-ը։

Նշվում է, որ բախումները տեղի են ունեցել Դեյր Զորի նահանգի քրդերի կողմից վերահսկվող հատվածներում մի քանի օր շարունակվող առանձին բախումների ֆոնին, երբ ԱՄՆ-ի կողմից աջակցվող քրդերի գլխավորած զինյալներն այնտեղ ձերբակալել են տեղական ռազմական մարմնի ղեկավարին:

Մարդու իրավունքների սիրիական դիտորդական խմբի (SOHR) ղեկավար Ռամի Աբդել Ռահմանը հայտնել է Հասաքե նահանգում «18 զոհի մասին (թուրքամետ) խմբավորումներից և հինգը՝ ռեժիմի ուժերից»՝ հավելելով, որ կան վիրավորներ։ Բախումները տեղի են ունեցել նահանգի հյուսիս-արևմուտքում գտնվող Թալ Թամր շրջանում։

Անկարայի կողմից աջակցվող ապստամբ խմբավորումների կոալիցիայի ուժերը, որոնք հայտնի են որպես Սիրիայի ազգային բանակ, նախօրեին փորձել են ներթափանցել տարածաշրջան օրվա սկզբին։ Սիրիական բանակը և քրդերի գլխավորած «Սիրիայի դեմոկրատական ուժերի» (SDF) հետ կապված տեղացի զինյալները պատասխանել են, ինչի հետևանքով էլ զոհեր կան։

Թալ Թամր շրջանը գտնվում է Անկարայի և նրա խմբավորումների վերահսկողության տակ գտնվող սահմանային տարածքի մոտ:

Ավելի վաղ՝ կիրակի, Սիրիայում ԱՄՆ դեսպանատունը հայտնել էր, որ բարձրաստիճան պաշտոնյաները հանդիպել են արևելյան Սիրիայի քրդերի գլխավորած ուժերի և համայնքի ղեկավարների հետ՝ քննարկելով մի քանի օր մահացու բռնություններից հետո ապաէսկալացիայի անհրաժեշտությունը:

Դեյր Զորի նահանգի քրդերի կողմից վերահսկվող շրջաններում մարտեր են սկսվել այն բանից հետո, երբ օգոստոսի 27-ին ԱՄՆ-ի կողմից աջակցվող SDF-ը ձերբակալել է Դեյր Զորի ռազմական խորհրդի ղեկավար Ահմադ ալ-Խաբիլին: Բռնությունների արդյունքում, ընդհանուր առմամբ, սպանվել է SDF-ի 23 զինյալ, 39 տեղացի մարտիկ և 9 քաղաքացիական անձ։

Էմմա Չոբանյան