30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Էրդողանը մեկնել է ՌԴ՝ Պուտինի հետ բանակցությունների
Քաղաքականություն
04.09.2023 | 13:04
Թուրքիայի նախագահ Ռեջեփ Թայիփ Էրդողանը մեկօրյա այցով մեկնել է Ռուսաստան։ Անադոլու գործակալության փոխանցմամբ՝ Ստամբուլի Աթաթուրքի անվան օդանավակայանում Էրդողանին ճանապարհել են փոխնախագահ Ջևդետ Յըլմազը, Ստամբուլի նահանգապետ Դավութ Գյուլը և այլ պաշտոնյաներ։
Հաղորդվում է, որ Թուրքիայի նախագահին այցի ընթացքում ուղեկցում են ԱԳ նախարար Հաքան Ֆիդանը, արդյունաբերության ու տեխնոլոգիաների նախարար Մեհմեդ Ֆաթիհ Քաջիրը, այլ պաշտոնյաներ։
Էրդողանի և ՌԴ նախագահ Վլադիմիր Պուտինի բանակցությունների առանցքային թեման Սևծովյան հացահատիկային գործարքն է, որին մասնակցությունը Մոսկվան դադարեցրել է հուլիսի 17-ին։
Կողմերը նաև քննարկելու են ռուս-ուկրաինական պատերազմի վերջին զարգացումները, թուրք-ռուսական երկկողմ հարաբերությունների վիճակը, ներառյալ՝ էներգետիկայի, առևտրի, տնտեսության և զբոսաշրջության ոլորտներում համագործակցությունը, սիրիական հակամարտությունը, ինչպես նաև տարածաշրջանային այլ հարցեր։
Հավելենք, որ սա նախագահի պաշտոնում վերընտրվելուց հետո Էրդողանի առաջին այցն է ՌԴ։ Ավելի վաղ այցով Մոսկվայում էր Թուրքայի ԱԳ նախարար Հաքան Ֆիդանը։
Էմմա Չոբանյան
