ՌԴ-ն մտադիր է շարունակել ռազմավարական գործընկերությունը Թուրքիայի հետ․ Շոյգուն՝ Թուրքիայի ԱԳ նախարարին

ՌԴ պաշտպանության նախարար Սերգեյ Շոյգուն Մոսկվայում հանդիպել է Թուրքիայի ԱԳ նախարար Հաքան Ֆիդանին։ ՌԴ ՊՆ-ի փոխանցմամբ՝ Սերգեյ Շոյգուն Հաքան Ֆիդանի հետ հանդիպման ժամանակ քննարկել է հացահատիկի գործարքը և Սիրիայում համատեղ աշխատանքը, գրում է ՏԱՍՍ-ը։

Շոյգուն նաև շնորհավորել է Թուրքիայի արտգործնախարարին նոր պաշտոնում նշանակվելու կապակցությամբ։ Նա ընդգծել է, որ Ֆիդանի՝ նախկին պաշտոնում աշխատելու ընթացքում (հետախուզական ծառայության պետ) երկրներին հաջողվել է շատ անհրաժեշտ և օգտակար գործեր անել թե՛ Ռուսաստանի, թե՛ Թուրքիայի, թե՛ ամբողջ աշխարհի համար։

Շոյգուի խոսքով՝ Մոսկվան բոլոր ջանքերը գործադրել է հացահատիկային գործարքը պահպանելու համար, և այն դադարեցվել է ոչ Ռուսաստանի մեղքով։

«Վերջին ամիսների աշխատանքներից է հացահատիկային գործարքը, որի համար մենք գործադրել ենք բոլոր ջանքերը։ Այն նախաձեռնել է Թուրքիայի հարգարժան նախագահ Ռեջեփ Թայիփ Էրդողանը։ Այսօր, ոչ մեր մեղքով, բայց այն դադարեցվել է։ Մենք կարող ենք միայն մի բան ասել, որ եթե կատարվի այն ամենը, ինչ խոստացել են Ռուսաստանին, ապա գործարքը կերկարաձգվի: Բայց պարզվեց, որ դա անելն ավելի դժվար է, քան նոր միջանցքներ, նոր ցամաքային ուղիներ կառուցելը»,- ասել  է ՌԴ ՊՆ ղեկավարը։

Նա նաև հավելել է, որ Ռուսաստանը մտադիր է շարունակել ռազմավարական երկկողմ գործընկերությունը Թուրքիայի հետ։

Հիշեցնենք, որ նախօրեին Ֆիդանը հանդիպել էր ՌԴ ԱԳ նախարար Սերգեյ Լավրովին։

Էմմա Չոբանյան