26.06.2026 | 16:54
Մահացել է ՌԴ պաշտպանության նախկին նախարար Սերգեյ Իվանովը
Արցախում հումանիտար ճգնաժամի վերաբերյալ Գերմանիայի ԱԳ նախարարի՝ «աղետալի» բնորոշումը Բաքվի դժգոհությունն է հարուցել
Քաղաքականություն
01.09.2023 | 16:57
Ադրբեջանի ԱԳՆ-ն դժգոհություն է հայտնել Արցախում հումանիտար ճգնաժամի վերաբերյալ Գերմանիայի ԱԳ նախարար Աննալենա Բերբոքի հայտարարությունների առնչությամբ։
Մասնավորապես, Բաքվին դուր չի եկել, որ Բերբոքն Արցախում ստեղծված իրավիճակն անվանել է աղետալի։
«Այս ամենը հայկական «կեղծ քարոզչության» արդյունքն է։ Ադրբեջանն արդեն առաջարկել է Ադրբեջանի Ղարաբաղի տարածաշրջանում բնակվող հայերին ստանալ այն ամենը, ինչն անհրաժեշտ է կյանքի համար։ Ադրբեջանի բարի կամքի կրկնվող մերժումը ցույց է տալիս, որ բոլոր մեղադրանքներն անհիմն են»,- հայտարարել է ԱԳՆ խոսնակ Այխան Հաջիզադեն։
Հիշեցնենք, որ նախօրեին Գերմանիայի ԱԳ նախարարն Արցախում իրավիճակն աղետալի էր անվանել։
«Այնտեղ մարդկանց վիճակն աղետալի է։ Մենք շտապ կոչով դիմում ենք Ադրբեջանին և Ռուսաստանին. Լեռնային Ղարաբաղի ժողովուրդը վերջապես պետք է ստանա այն, ինչ անհրաժեշտ է կյանքի համար: Լաչինի միջանցքը պետք է բաց լինի մարդասիրական օգնության համար»,- ասել էր Բերբոքը։
Նա նաև նշել էր, որ մի քանի օր է, ինչ կարծիքների փոխանակումներ են իրականացվում ամերիկացի գործընկերների հետ՝ երաշխավորելու համար, որ Լեռնային Ղարաբաղի ժողովուրդը վերջապես կստանա մարդասիրական օգնություն։
Էմմա Չոբանյան
