15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Ադրբեջանական սադրանքի հետևանքով հայկական կողմն ունի 3 կորուստ, 2 վիրավոր․ ՀՀ ՊՆ․ ՏԵՍԱՆՅՈՒԹ
Քաղաքականություն
01.09.2023 | 16:15
Հայկական կողմն ադրբեջանական սադրանքի հետևանքով 3 զոհ և երկու վիրավոր ունի, հաղորդում են Պաշտպանական գերատեսչությունից։ Թշնամու կրակի հետևանքով զոհված զինծառայողներից երկուսը Մասիս քաղաքից են՝ Անդրանիկ Արշակի Անտոնյան և Արսեն Ալեքսանդրի Մկրտչյան։ Այս մասին էլ տեղեկացնում է Մասիսի քաղաքապետ Դավիթ Համբարձումյանը։
Նշենք, որ թշնամին վաղ առավոտից ինտենսիվ կրակ է բացել Սոթքի հայկական դիրքերի ուղղությամբ՝ կիրառելով ԱԹՍ-ներ ու ականանետներ։ Ժամը 12:25-ից էլ Ադրբեջանի ԶՈՒ-ն հրաձգային զենքերից կրակ է բացել Նորաբակի հատվածում տեղակայված հայկական դիրքերի ուղղությամբ:
Երկու ժամ առաջ պաշտպանական գերատեսչությունը տեսանյութ հրապարակեց, որտեղ երևում է, թե ինչպես է թշնամին լրացուցիչ միջոցներ կենտրոնացնում Սոթքի ուղղությամբ:
Գեղարքունիքի մարզպետ Կարեն Սարգսյանը մեկ ժամ առաջ Factor TV-ի հետ զրույցում ասաց՝ իրավիճակը հանգիստ է, խուճապ չկա։
Սահմանային իրավիճակի վերաբերյալ վերջին հաղորդագրությունը ՊՆ-ն տարածել է մեկ ժամ առաջ․ ժամը 15:15-ի դրությամբ՝ կրակի ինտենսիվության նվազումը պահպանվում է։ ՊՆ-ից նաև տեղեկացնում են, որ ադրբեջանական քարոզչամեքենան ստահոդ տեղեկություններ է տարածում այն մասին, թե, իբր, ՀՀ ԶՈՒ-ն մեծ քանակությամբ զենք, ռազմական տեխնիկա և անձնակազմ է կենտրոնացնում Սոթքի հատվածում:
Մանրամասները՝ տեսանյութում։
Արփի Հակոբյան
