ԱՊՀ երկրների վարչապետները կքննարկեն միասնական բյուջեի ձևավորումը և ՀՕՊ համակարգի ֆինանսավորումը

ԱՊՀ երկրների վարչապետների խորհրդի՝ հոկտեմբերի 27-ին Բիշքեկում կայանալիք նիստում կքննարկվի Համագործակցության 2024 թվականի միասնական բյուջեի և հակաօդային պաշտպանության համակարգի ձևավորման հարցը։ Այս մասին BelTA-ին ասել է ԱՊՀ գլխավոր քարտուղար Սերգեյ Լեբեդևը։

Նա նշել է, որ խորհրդի օրակարգի հիմնական ցուցակն արդեն ձևավորվել է։ Այն կներառի տնտեսական և հումանիտար, ԱՊՀ մարմինների գործունեության ֆինանսավորման վերաբերյալ հարցեր, փոխանցում է Ինտերֆաքսը։

«Մասնավորապես, ֆինանսական հարցերը կզբաղեցնեն օրակարգի մեծ մասը. ներառված է 11 հարց, որոնք վերաբերում են ԱՊՀ-ի երկրների՝ հաջորդ տարվա միասնական բյուջեի ձևավորմանը, Հումանիտար համագործակցության միջպետական հիմնադրամի ֆինանսավորմանը, 2024 թվականին ԱՊՀ երկրների ՀՕՊ համակարգի ֆինանսավորմանը»,- հայտնել է նա։

Ըստ գլխավոր քարտուղարի՝ վարչապետներին կառաջարկվի քննարկել համատեղ գործունեության մի քանի ծրագրեր։

«Կառավարությունների ղեկավարներին կառաջարկվի հաստատել այն միջոցառումների պլանը, որոնք կապված են Հայրենական մեծ պատերազմում տարած հաղթանակի 80-ամյակի հետ: Այն կնշվի 2025 թվականին: Պետությունների ղեկավարներն արդեն որոշում են ընդունել 2025 թվականին ԱՊՀ-ում հայտարարել Հայրենական մեծ պատերազմում տարած հաղթանակի 80-ամյակի տարի: Համագործակցության բոլոր երկրները, որոնց ժողովուրդները մասնակցել են ֆաշիզմի դեմ պայքարին, այդ օրվան նվիրված համապատասխան կարևոր միջոցառումներ կանցկացնեն իրենց երկրներում»,- պարզաբանել է նա։