15.12.2024 | 15:19
Հայաստանում սպասվում է փոփոխական եղանակ, լեռնային շրջաններում՝ ձյուն և բուք
Անհեթեթություն է. նախագահականը` Պրիգոժինի մահվան կապակցությամբ Պուտինին ցավակցելու մասին
25.08.2023 | 20:28
Նախագահի աշխատակազմի հասարակայնության հետ կապերի վարչության պետ Աղասի Մարգարյանն անհեթեթություն է որակում ՀՀ նախագահ Վահագն Խաչատուրյանին վերագրվող ցավակցական ուղերձն ուղղված ՌԴ նախագահ Վլադիմիր Պուտինին` «Վագներ» ռազմականացված խմբավորման ղեկավար Եվգենի Պրիգոժինի մահվան հետ կապված։ Այս մասին Factor.am-ի հարցին ի պատասխան՝ ասաց նախագահի աշխատակազմի պաշտոնյան։
«ՀՀ նախագահի բոլոր ուղերձները, ելույթները, շնորհավորանքներն ու ցավակցությունները հրապարակվում են Հանրապետության նախագահի պաշտոնական կայքում»,- հավելեց նա։
Նշենք, որ երեկվանից Ֆեյսբուք սոցիալական ցանցում տարածվում է մի սքրինշոթ, ըստ որի՝ Վահագն Խաչատուրյանը ցավակցել է Պուտինին «ՌԴ հերոս Պրիգոժինի անժամանակ մահվան կապակցությամբ և հույս հայտնել, որ մեղավորները կպատժվեն»։
Հիշեցնենք` օգոստոսի 23-ին ՌԴ Տվերի մարզում կործանվել է օդանավ, որի մեջ եղել է Եվգենի Պրիգոժինը։ Զոհվել է 10 մարդ։
Պրիգոժինը հունիսի 23-ի գիշերը լույս 24-ին իր ենթակայության ներքո գտնվող զինտեխնիկայով և զորքով շարժվել էր դեպի Մոսկվա, սակայն նույն օրը երեկոյան` Մոսկվայից կարճ հեռավորության վրա, դադարեցրել գործողությունները։
