Եվգենի Պրիգոժինն ու Դմիտրի Ուտկինը «նմանակներ» են ունեցել

Ե՛վ «Վագներ» մասնավոր ռազմականացված խմբավորման հիմնադիրը, և՛ վագներականների հրամանատարն ունեցել են «նմանակներ»՝ քաղաքացիներ, ովքեր պաշտոնապես փոխել էին իրենց ազգանունը, անունը և հայրանունը՝ անձնագրեր ստանալով Եվգենի Վիկտորովիչ Պրիգոժինի և Դմիտրի Վալերիևիչ Ուտկինի անուններով։

Նրանց մասին հայտնի էր դառնում, եթե անձնական տվյալների փոփոխությունը գրանցվում էր իրավաբանական անձանց միասնական պետական ռեգիստրում, կամ դատական քրոնիկոնից, գրում է BBC-ի ռուսական ծառայությունը։ «Նմանակներ»-ից մեկը, նախկինում Լեոնիդ Կրասավին անուն ազգանունով,  ծննդյան նույն տարեթիվն ունի, ինչ Պրիգոժինը։ Լրատվամիջոցները ենթադրում են, որ հենց նա է թռել Լիտվա, երբ Պրիգոժինն արդեն պատժամիջոցների տակ էր։ Այն ժամանակ Լիտվայի պետական անվտանգության դեպարտամենտի ղեկավար Դարիուս Յաունիշկիսը «Ազատություն» ռադիոկայանին տված հարցազրույցում պնդել էր, որ գործողությունը նախապատրաստվել է ռուսական հատուկ ծառայությունների կողմից՝ ցույց տալու Եվրամիության և եվրոպացի սահմանապահների թուլությունը։
Դմիտրի Ուտկինի լիակատար նմանակը մի քանի ամիս գլխավորել է Պրիգոժինին պատկանող Concord Management and Consulting ընկերությունը, որից հետո նա վերականգնել է իր նախկին անունը։ Նման կերպ էին վարվում նաև Պրիգոժինի անվանակիցները, բայց արդյո՞ք «նմանակներ» են օգտագործել «Վագների» երկու ղեկավարները Տվերի մոտ ավիավթարի պահին, հայտնի չէ:

Ապստամբության օրը Պրիգոժինի տանը խուզարկությունների ժամանակ ուժայինները հայտնաբերել էին կեղծ անձնագրեր, այդ թվում՝ այլ անձանց անունով տրված, բայց նրա լուսանկարով։ Երբեմն դրանցում նշված անձնական տվյալները պատկանում էին իրական մարդկանց։ Մասնավորապես, Պրիգոժինը, այլ անունով, եղել է СОГАЗ բժշկական կենտրոնի VIP հիվանդ։

Ապստամբությունից հետո Պրիգոժինը, հայտարարելով Բելառուս մեկնելու մասին, սկսեց հայտնվել Սանկտ Պետերբուրգում և Մոսկվայում։ The New York Times-ը հուլիսին հայտնել էր Պենտագոնի այն վարկածի մասին, որ Պրիգոժինը օգտագործում է «երկվորյակների»՝ իր տեղաշարժը թաքցնելու համար։

Հիշեցնենք, որ օգոստոսի 23-ի երեկոյան Տվերի մարզում կործանվել է «Վագների» հիմնադիր Եվգենի Պրիգոժինին պատկանող մասնավոր ինքնաթիռը։ Օդային տրանսպորտի դաշնային գործակալության տվյալներով՝ ուղևորների ցուցակում է նաև գործարար, մասնավոր ռազմականացված ընկերության հրամանատար Դմիտրի Ուտկինը։

«Վագներին» մոտ կանգնած Grey Zone Telegram-ալիքը հայտնել է, որ Պրիգոժինն ու Ուտկինը զոհվել են։ Վարձկանների հետ կապ ունեցող մեկ այլ ալիք կոչ է արել չհրապարակել Պրիգոժինի ճակատագրի մասին չստուգված տեղեկություններ։

Հավելենք, որ Պրիգոժինի ինքնաթիռի կործանումը տեղի է ունեցել մասնավոր ռազմականացված խմբավորման հիմնադրի ապստամբությունից երկու ամիս անց։

«Ինտերֆաքսի» տեղեկություններով՝ որոնողական օպերացիան բիզնես-ջեթի կործանման վայրում ավարտված է։ Հայտնաբերվել է 10 մարդու դի։