15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ՌԴ օդատիեզերական ուժերի հրամանատարն ազատվել է պաշտոնից․ ռուսական ԶԼՄ
Քաղաքականություն
23.08.2023 | 12:46
Ռուսաստանի նախագահ Վլադիմիր Պուտինը գեներալ Սերգեյ Սուրովիկինին հեռացրել է օդատիեզերական ուժերի հրամանատարի պաշտոնից, հայտնել է «Էխո Մոսկվի»-ի նախկին գլխավոր խմբագիրը։ Նրան հետեւելով այս մասին հայտնել են ռուսական այլ լրատվամիջոցներ, ինչպես նաև մի շարք Telegram-ալիքներ։ Պրիգոժինի ապստամբությունից հետո հասարակության տեսադաշտից անհետացած գեներալի հրաժարականի պաշտոնական հաստատում դեռևս չկա, գրում է BBC-ի ռուսական ծառայությունը։
«Էխո Մոսկվիի» նախկին գլխավոր խմբագիր Ալեքսեյ Վենեդիկտովը իր Telegram ալիքում գրել է, որ Սուրովիկինը հեռացվել է իր պաշտոնից, որը նա զբաղեցնում էր 2017 թվականից, սակայն մնացել է ՌԴ ՊՆ ռեզերվում։
Հեռուստահաղորդավարուհի Քսենյա Սոբչակը ևս հայտնել է , որ, իր ունեցած տեղեկություններով՝ օգոստոսի 18-ի փակ հրամանագրով Սուրովիկինը հեռացվել է զբաղեցրած պաշտոնից։ RBC-ն, հղում անելով սեփական աղբյուրներին, գրում է, որ Սուրովիկինը հեռացվել է զբաղեցրած պաշտոնից «այլ աշխատանքի տեղափոխվելու պատճառով» և այժմ գտնվում է «կարճ արձակուրդում»։
Սուրովիկինը 2022 թվականի հոկտեմբերից մինչև 2023 թվականի հունվարը եղել է Ուկրաինայում Ռուսաստանի զինված ուժերի միացյալ խմբի հրամանատարը, այնուհետև դարձել է հրամանատարի տեղակալ։
