Մոսկվան ԱԹՍ-ների հարձակման է ենթարկվել․ դրանցից մեկը բախվել է «Մոսկվա-սիթի» համալիրին․ ՏԵՍԱՆՅՈՒԹ

ՌԴ պաշտպանության նախարարությունը հայտարարել է, որ այս գիշեր երեք անօդաչու թռչող սարքեր են թռել դեպի Մոսկվա։ Երկուսը խոցվել է Մոսկվայի մերձակայքում, երրորդը, ըստ նախարարության, «ճնշվել է», կորցրել  կառավարումը և ընկել «Մոսկվա-սիթիի» համալիրի վրա,- գրում է BBC-ի ռուսական ծառայությունը։

«Մայրաքաղաքի վրա գրոհած ուկրաինական անօդաչու թռչող սարքերից երկուսը ոչնչացվել է ՀՕՊ համակարգերի կողմից Մոսկվայի մարզի Մոժայսկի և Խիմկի շրջանների տարածքում։ Երրորդ անօդաչու թռչող սարքը ճնշվել է ռադիոէլեկտրոնային պայքարի միջոցներով և, կորցնելով կառավարումը, բախվել է կառուցվող «Մոսկվա-սիթի» համալիրի շենքին»,- նախարարության հաղորդագրությունը մեջբերում են ռուսական գործակալությունները։

Կիևը մինչ օրս պաշտոնապես չի ընդունել, որ Մոսկվան թիրախավոր ԱԹՍ-ները իրենն են։ Այս հարձակումները շարունակվում են արդեն մի քանի գիշեր անընդմեջ։ Ինչ վերաբերում է «Մոսկվա-սիթի» երկնաքերին, ապա սա արդեն չորրորդ դեպքն է, երբ անօդաչու սարքերը հարվածում են համալիրին։

Առաջին երկու դեպքում՝ հուլիսի 30-ին և օգոստոսի 1-ին, անօդաչուները հարվածել էին այն հատվածին, որտեղ տեղակայված են ռուսական երկու նախարարությունները՝ թվային զարգացման և տնտեսական զարգացման նախարարությունները:  ՌԴ ՊՆ-ն երկու դեպքում էլ, ինչպես այս անգամ, հայտարարել է, որ անօդաչու սարքերը ճնշվել են ռադիոէլեկտրոնային պայքարի միջոցներով և կորցրել են կառավարումը։
Երրորդ հարձակումը «Մոսկվա-սիթի»-ի ուղղությամբ տեղի է ունեցել օգոստոսի 18-ի գիշերը՝ անօդաչու թռչող սարքը խոցվել է, իսկ բեկորներն ընկել են «Էքսպոկենտրոնի» տարածքում՝ երկնաքերերի մոտ։

Մանրամասները՝ տեսանյութում