08.09.2026 | 21:50
Գագիկ Խաչատրյանի միլիարդները մի բանակի ունեցվածք է․ ՀՀ-ի դեմ մեծ հանցագործություն է տեղի ունեցել․ Գուրգեն Սիմոնյան. ՏԵՍԱՆՅՈՒԹ
21-ամյա Հելենի աճյունն արդեն 9 օր է՝ չի հաջողվում Արցախ տեղափոխել․ ՏԵՍԱՆՅՈՒԹ
Քաղաքականություն
22.08.2023 | 19:32
Արդեն 9-րդ օրն է՝ արցախցի Հելեն Դադայանի աճյունը Գորիսի դիահերձարանում է։ 21-ամյա աղջիկը Գյումրի-Երևան ավտոճանապարհին 11 հոգու կյանք խլած ողբերգական ավտովթարի զոհերից մեկն էր։ Աղջկա մայրը՝ Ալվարդ Սաֆարյանը, մի քանի քաղաքացիների հետ Արցախում Կարմիր խաչի գրասենյակի առջև մի քանի օր շարունակ ակցիա էին իրականացնում՝ պահանջելով Հելենի մարմինը ծննդավայր՝ Արցախի Ճարտար գյուղ տեղափոխել։
Աղջկա մորեղբայրը՝ Մուշեղ Սաֆարյանը Factor TV-ին պատմեց, որ արդեն 8-րդ օրն է՝ Գորիսում է։ Սպասում են պատասխանի՝ Հելենի աճյունը ծննդավայր տեղափոխելու համար։ Նա պահանջում է պատասխանատու մամիններից կատարել իրենց աշխատանքը։ Սաֆարյանի խոսքով՝ Կարմիր խաչն առայժմ չի կարողանում իր գործառույթը կատարել։ Ասում է՝ նույնիսկ տեղյակ չեն, թե ինչ պատճառով են տեղափոխումը մերժում։
Հելենի աճյունը տեղափոխելու պահանջով ակցիաներ են իրականացվել նաև Կարմիր խաչի հայաստանյան գրասենյակի դիմաց։ Հայաստանում ԿԽՄԿ հաղորդակցման ծրագրերի ղեկավար Զառա Ամատունին Factor TV-ին ասաց՝ իրենց լիազորությունների շրջանակում համապատասխան քայլեր են ձեռնարկվում 21-ամյա Հելինի աճյունը ծննդավայր տեղափոխելու ուղղությամբ։
Գյումրի-Երևան ճանապարհին տեղի ունեցած ողբերգական ավտովթարից մահացած 21-ամյա Հելեն Դադայանի մարմինը հայրենիք վերդարձնելու խնդրին թվիթերյան գրառմամբ ադրադարձել էր նաև Ֆրանսիայի խորհրդարանի պատգամավոր Անն Լորանս Պետելը։ Պատգամավորը դիմել է ԵՄ հանձնաժողովի նախագահ Ուրսուլա ֆոն դեր Լեյենին և ԵՄ Խորհրդի նախագահ Շառլ Միշելին։
Ուշագրավ է, որ թեև շուրջ 10 օր է՝ չի ստացվում Արցախի 21-ամյա բնակչի մարմինը տեղափոխել ծննդավայր, երեկ ՌԴ խաղաղապահների կողմից տեղի է ունեցել Ռուսաստանի և ԼՂ-ի 41 քաղաքացիների տեղափոխություն Արցախից Հայաստան, ինչը հունիսի 14-ից ի վեր առաջին դեպքն է: Ըստ Արցախի տեղեկատվական շտաբի հաղորդագրության՝ ՌԴ քաղաքացիները վաղուց էին սպասում իրենց տեղափոխությանը, իսկ Արցախի քաղաքացիներն ուսանողներ են, որոնք ընդունվել են ՀՀ-ի և արտասահմանյան բուհեր: Ռուս խաղաղապահների հետ ձեռքբերված նախնական պայմանավորվածության համաձայն՝ առաջիկա օրերին շարունակվելու է ուսանողների և ՌԴ քաղաքացիների տեղափոխությունը:
Մանրամասները՝ տեսանյութում։
Անի Թամրազյան
