07.10.2026 | 23:48
Արթուր Դանիելյանը կալանավորվեց
Դոնալդ Թրամփին թողել են ազատության մեջ 200 հազար դոլար գրավի դիմաց
Քաղաքականություն
22.08.2023 | 12:52
ԱՄՆ Ջորջիա նահանգի դատավորը, որը հետաքննում է ընտրությունների արդյունքների ամփոփմանը միջամտելու՝ Դոնալդ Թրամփի փորձերը, որոշել է նախկին նախագահին ազատության մեջ թողնել միլիարդատիրոջ համար չնչին՝ 200 հազար դոլար գրավի դիմաց, գրում է BBC-ի ռուսական ծառայությունը։
Թրամփն ու գործով 18 այլ մեղադրյալներ պետք է ուրբաթ կեսօրից առաջ ներկայանան նահանգի մայրաքաղաք Ատլանտայի Ֆուլթոնի շրջանային դատարան։
Թրամփը հերքում է այս գործով, ինչպես նաև իր դեմ հարուցված մյուս երեք քրեական գործերով իրեն առաջադրված մեղադրանքները։
Գրավի որոշման մեջ ասվում է, որ Դոնալդ Թրամփը կարող է ազատության մեջ մնալ մինչև դատավարությունը՝ պայմանով, որ չփորձի սպառնալ վկաներին և հանցակիցներին։
«Մեղադրյալը չպետք է ահաբեկման գործողություններ կատարի իրեն հայտնի անձանց նկատմամբ, ովքեր այս գործով մեղադրյալներ կամ վկաներ են, կամ այլ կերպ խոչընդոտի արդարադատության ընթացքը։ Վերոնշյալը ներառում է սոցիալական ցանցերում գրառումներ կամ այլոց կողմից սոցցանցերում հրապարակված գրառումների վերահրապարակում»,- ասված է որոշման մեջ։
