03.04.2026 | 23:13
NASA-ն հրապարակել է Երկրի նոր լուսանկարը
Միացյալ Նահանգները կոչ է արել իր քաղաքացիներին անհապաղ հեռանալ Բելառուսից
Քաղաքականություն
22.08.2023 | 12:02
Մինսկում ԱՄՆ դեսպանատունը Բելառուսում գտնվող իր քաղաքացիներին կոչ է արել անհապաղ հեռանալ երկրից։ Օգոստոսի 21-ին դիվանագիտական առաքելության կայքում տեղադրված հայտարարության մեջ մատնանշվում է այն փաստը, որ Լիտվան վերջին օրերին փակել է Բելառուսի սահմանային վեց անցակետերից երկուսը, ինչպես նաև այն, որ Լեհաստանի, Լիտվայի և Լատվիայի կառավարությունները հայտարարել են Բելառուսի հետ սահմանային անցակետերի հետագա փակման հնարավորության մասին, փոխանցում է DW-ի ռուսական ծառայությունը։
ԱՄՆ դեսպանատունը խորհուրդ է տվել Բելառուսից հեռանալ Լիտվայի և Լատվիայի հետ մնացած սահմանային անցակետերով, կամ ինքնաթիռով։
«ԱՄՆ քաղաքացիներին թույլ չեն տալիս ցամաքային ճանապարհով Բելառուսի տարածքով մուտք գործել Լեհաստան, մի՛ գնացեք Ռուսաստան կամ Ուկրաինա»,- ասված է դիվանագիտական ներկայացուցչության հայտարարության մեջ։
Բացի այդ, ԱՄՆ-ը կոչ է արել իր քաղաքացիներին չմեկնել Բելառուս, քանի որ երկրի իշխանությունները շարունակում են նպաստել Ուկրաինայի դեմ ռուսական ռազմական ագրեսիային: Բացի այդ, հայտարարության մեջ նշվում է Բելառուսում ռուսական ռազմական ուժերի կուտակման, օրենքների կամայական կիրառման, անկարգությունների հավանականության, կալանավորման վտանգի և Բելառուսում բնակվող կամ որպես զբոսաշրջիկ այցելող իր քաղաքացիներին հյուպատոսական օգնություն ցուցաբերելու ԱՄՆ դեսպանատան սահմանափակ հնարավորությունների մասին։
Հիշեցնենք, որ օգոստոսի 16-ին Լիտվայի կառավարությունը հայտարարեց օգոստոսի 18-ից Բելառուսի հետ սահմանին գտնվող վեց անցակետերից երկուսը փակելու մասին՝ դա բացատրելով «աշխարհաքաղաքական հանգամանքներով»։
