07.10.2026 | 23:48
Արթուր Դանիելյանը կալանավորվեց
ԱՄՆ-ը հավանություն է տվել Դանիայից և Նիդերլանդներից Ուկրաինա F-16-ներ ուղարկելուն
Քաղաքականություն
18.08.2023 | 13:25
ԱՄՆ-ը պաշտոնապես հավանություն է տվել Դանիայից ու Նիդերլանդներից Ուկրաինա F-16 կործանիչներ ուղարկելուն, գրում է Reuters լրատվական գործակալությունը։
Հրապարակման մեջ ասվում է, որ Վաշինգտոնը նամակ է ուղարկել երկու երկրների կառավարություններին, որում վստահեցրել է, որ Միացյալ Նահանգները կհաստատի տեխնոլոգիաների փոխանցման հարցումները։ Դա կարող է տեղի ունենալ այն բանից հետո, երբ ուկրաինացի օդաչուները F-16-ը կառավարելու պատրաստություն կանցնեն, պարզաբանում է գործակալությունը։
Reuters-ի թղթակիցները ծանոթացել են ԱՄՆ պետքարտուղար Էնթոնի Բլինքենի նամակի պատճենին՝ ուղղված Դանիայի և Նիդերլանդների արտաքին գործերի նախարարներին, որում նա վստահեցնում է, որ հաստատման հետ կապված խնդիրներ չեն լինի։
«Այս նամակով ԱՄՆ-ի լիակատար աջակցությունն եմ հայտնում ինչպես Ուկրաինային F-16 ինքնաթիռներ փոխանցելուն, այնպես էլ ուկրաինացի օդաչուներին որակյալ հրահանգիչների կողմից պատրաստելու հարցում։ Շատ կարևոր է, որ Ուկրաինան կարողանա պաշտպանվել Ռուսաստանի շարունակական ագրեսիայից և իր ինքնիշխանության ոտնահարումից»,- ասվում է փաստաթղթում։
Բլինքենի նամակն ուղարկվել է այն բանից հետո, երբ Դանիայի և Նիդերլանդների կառավարությունները խնդրել են ԱՄՆ-ին հաստատել ինքնաթիռի մատակարարմանն իրենց համաձայնությունը։ ԱՄՆ պետքարտուղարի խոսքով՝ հարցումների հաստատումը թույլ կտա Ուկրաինային «լիովին օգտվել նոր հնարավորություններից, հենց որ օդաչուների առաջին խումբն ավարտի իր վերապատրաստումը»։
