15.01.2026 | 13:42
Ըստ Սինանյանի՝ երկու հայ է զոհվել Իրանում բողոքի ցույցերի ընթացքում․ ՏԵՍԱՆՅՈՒԹ
Ջրային պարեկները Սևանա լճում ջրային տրանսպորտի երթևեկության խախտումները կարձանագրեն. Փաշինյան․ ՏԵՍԱՆՅՈՒԹ
Հասարակություն
17.08.2023 | 12:46
Կառավարության այսօրվա նիստում ՀՀ Ներքին գործերի նախարար Վահե Ղազարյանը ներկայացրեց «Հայաստանի Հանրապետության 2023 թվականի պետական բյուջեի մասին» Հայաստանի Հանրապետության օրենքում վերաբաշխում և փոփոխություններ, Հայաստանի Հանրապետության կառավարության 2022 թվականի դեկտեմբերի 29-ի N 2111-Ն որոշման մեջ փոփոխություններ ու լրացումներ կատարելու մասին նախագիծը։
«Այս նախագիծը նախատեսվել է հիմնականում ՆԳ Ոստիկանության պարեկային ծառայության և դրա կազմում ձևավորվող ջրային պարեկային ծառայության ստորաբաժանման գործունեության նյութատեխնիկական ապահովման, ինչպես նաև ՆԳՆ Ոստիկանության կարիքների համար ֆինանսական միջոցների վերաբաշխում կատարելու նպատակով» ,- նշեց նախարարը հավելելով, որ ջրային պարեկային ծառայության ստորաբաժանման ստեղծման նպատակը Սևանա լճում և լճի ավազանում իրավախախտումների դեմ պայքարի արդյունավետության բարձրացումն է։
Նորաստեղծ ստորաբաժանումը կգործի պարեկային ծառայության Գեղարքունիքի մարզի ստորաբաժանման ենթակայությամբ, և Սևանա լճում ջրային ժամանակակից տեխնիկայով ու հանդերձանքով պարեկություն կիրականացնեն համապատասխան որակավորմամբ պարեկները։
«Սա հերթական քայլերից է Հայաստանում պարեկային ծառայության ներդրման ավարտի համար։ Մենք Սևանա լճում հսկողություն ավելացնելու անհրաժեշտություն ունենք, և ջրային ոստիկանությամբ ունենալու ենք կոմբինացված ծառայություն՝ ոստիկանության, փրկարարների և Սևան ազգային պարկի համագործակցությամբ։
Այս տարի հանրային լողափներում մենք ջրահեղձության երկու դեպք ենք ունեցել, քննություն է ընթանում, որովհետև գոնե նման լողափներում մենք ջրահեղձության դեպքեր չպետք է ունենանք։
Սևանա լճում ջրային պարկների աշխատանքն էական փոփոխություն կբերի։ Սա նշանակում է, որ Սևանա լճում ջրային տրանսպորտային միջոցների երթևեկության կարգի խախտման դեպքում արձանագրումներ կլինեն, ալկոհոլի օգտագործման վերաբերյալ ստուգումներ կլինեն»,- նշեց վարչապետ Նիկոլ Փաշինյանը։
Ծառայությունն իրականացնելու համար նախնական ձեռք է բերվել 8 երկտեղանոց և 3 տեղանոց չորս սկուտեր։
«Մենք ձեռք ենք բերելու 4 նավ՝ մոտ 10մ երկարությամբ, որոնք շուրջտարյա ծառայություն կիրականացնեն Սևանա լճում։ Այսինքն՝ ապօրինի ձկնաորսությունը գործնականում լինելու է անհնարին։ Սևանա լիճը կհսկվի նաև դրոններով»- նշեց վարչապետը։
Մանրամասները՝ տեսանյութում։
