24.02.2026 | 12:34
Հայ բռնցքամարտիկները հաղթանակով են մեկնարկել հեղինակավոր մրցաշարում
The Killers ռոք խմբին Վրաստանում սուլել են այն բանից հետո, երբ խմբի մենակատարը բեմ է հրավիրել ՌԴ-ից եկած թմբկահարին
Քաղաքականություն
16.08.2023 | 23:35
Վրաստանում ամերիկյան The Killers ալտերնատիվ ռոք խմբի համերգին մենակատարը բեմ է հրավիրել Ռուսաստանից ժամանած թմբկահարի, ինչից հետո հանդիսատեսը սուլել է կատարողներին, իսկ երկրպագուներից մի քանիսը հեռացել են համերգից, գրում է Newsgeorgia-ն։
Բացի այդ, նշվում է, որ «Ռադիո Թբիլիսին» իր եթերից հանել է խմբի երգերը։
Համերգը տեղի է ունեցել Բաթումիի Black Sea Arena մարզադաշտում։ Հանդիսատեսից մեկը «If destiny’s kind I’ll be your drummer tonight» (Եթե ճակատագիրը բարի լինի, այսօր ես կլինեմ ձեր թմբկահարը) գրությամբ պաստառ է պահել։ Խմբի մենակատար Բրենդոն Ֆլաուերսը երիտասարդին բեմ է հրավիրել ու նրան հարցրել է, թե որտեղից է։ Երաժիշտը պատասխանել է, որ իր անունը Անդրեյ է, և որ ինքը Ռուսաստանից է։ Մենակատարը հայտարարել է, որ դա իր համար խնդիր չէ, և հանդիսատեսին հարցրել է՝ ընդունելի՞ է, որ նրանք միասին նվագեն։
Դրանից հետո հանդիսատեսը հայհոյանքներ է հնչեցնել, մի մասը լքել է մարզադաշտը։ Հանդիսատեսը ձեռքերի վրա է բարձրացրել մի տղամարդու, հավանաբար՝ վրացու, և խնդրել նրա հետ նվագել։ Չնայած սրան՝ The Killers-ը մեկ երգ կատարել է ՌԴ-ից թմբկահարի նվագակցությամբ։ Խմբի անդամը հայտարարել է, որ բոլոր մարդիկ եղբայրներ են, և շարունակել է համերգը։
