Քաղաքականություն
16.08.2023 | 13:01
Ուկրաինայի Պաշտպանության փոխնախարար Աննա Մալյարը պնդում է, որ ուկրաինացի զինվորականներն ազատագրել են Դոնեցկի մարզի Ուրոժայնոյե գյուղը, որի համար վերջին օրերին կատաղի մարտեր էին ընթանում, փոխանցում է BBC-ի ռուսական ծառայությունը։
«Ուրոժայնոյեն ազատագրվել է։ Մեր պաշտպանները ամրացել են սահմանների վրա։ Հարձակողական գործողությունները շարունակվում են»,- գրել է նա իր Telegram-ալիքում։
Ուկրաինացի զինվորականները գյուղի ուղղությամբ հարձակումը սկսել էին օգոստոսի սկզբին։ Անցած շաբաթվա վերջին New York Times-ը, վկայակոչելով վերլուծաբաններին, ուկրաինացի պաշտոնյաներին և ռուս զինվորական բլոգերներին, գրել էր, որ Ուկրաինայի զինված ուժերը հաստատվել են ավերված Ստարոմայորսկոյե գյուղի տարածքում և շարժվում են դեպի Ուրոժայնոե։
Ավելի վաղ հնչած տեղեկություններն այն մասին, որ ռուսական ուժերը լքել են Ուրոժայնոյեն, չէին հաստատվել, և այնտեղ մարտերը շարունակվել են։ Վերջին օրերին ՌԴ պաշտպանության նախարարությունը հայտարարել է, որ ռուսական օդուժը հարվածներ է հասցրել «Ուկրաինայի Զինված ուժերի կենդանի ուժի և տեխնիկայի կուտակման վայրերին» Ստարոմայորսկի և Ուրոժայնոեի շրջաններում, ինչպես նաև «Օկտյաբր» սովխոզին։
