Պաշտոնաթող ընդդիմադիր գնդապետը ՌԴ-ում տուգանվել է «բանակը վարկաբեկելու» համար

Մոսկվայի Տվերսկոյի շրջանային դատարանը 40,000 ռուբլով տուգանել է Գլխավոր հետախության վարչության պաշտոնաթող գնդապետ Վլադիմիր Կվաչկովին՝ «ռուսական բանակը վարկաբեկելու» վարչական գործով, հայտնել է Mediazona իրավապաշտպան նախագիծը։

Կվաչկովի դեմ հարուցված գործի պատճառն «Օդնոկլասսնիկի» սոցցանցում երեք գրառումն է եղել։ Ինքը՝ Կվաչկովը, պնդել է, որ առնչություն չունի այն սոցցանցի հետ, որտեղ հրապարակվել են այդ գրառումները։ Նրա խոսքով՝ ինքն ընդհանրապես չի օգտվում սոցիալական ցանցերից։

Mediazona-ի փոխանցմամբ՝ դատական նիստից առաջ լրագրողները Վլադիմիր Կվաչկովին հարցրել են՝ արդյո՞ք իրեն մեղավոր է համարում, ինչին պաշտոնաթող գնդապետը պատասխանել է. «Պուտինն ու նրա թիմն են մեղավոր»։

«Իմ կարծիքով՝ զինված ուժերը վարկաբեկում են հետևյալ քաղաքացիները՝ (ՌԴ նախագահ Վլադիմիր) Պուտինը, (ՊՆ ղեկավար Սերգեյ) Շոյգու, (Գլխավոր շտաբի պետ Վալերի) Գերասիմովը»,- հանդիպման ընթացքում ասել է նա։

Այս արտահայտությունից հետո դատավորն ընդհատել է նրան։ Այնուհետև Կվաչկովն ասել է. «Զինված ուժերը վարկաբեկված են նրանց կողմից, ովքեր չեն կարող պատերազմել: Բայց մենք կարող ենք դա անել և գիտենք, թե ինչպես»:

74-ամյա Վլադիմիր Կվաչկովը բռնակցված Դոնեցկի հանրապետության նախկին «պաշտպանության նախարար» Իգոր Ստրելկովի (Գիրկին) համախոհն է։ Ապրիլին նա հանդես էր եկել Սանկտ Պետերբուրգի ազգայնական «Լիստվա» պարբերականում՝ նշելով, թե «ինչն է սխալ» ուկրաինական պատերազմում։

Կվաչկովն ակտիվորեն աջակցում է Ուկրաինայի դեմ պատերազմին, միևնույն ժամանակ, սակայն, քննադատում է Ռուսաստանի իշխանություններին և ռուսական զինված ուժերի հրամանատարությանն այս պատերազմը մղելու համար։ Նա Համառուսաստանյան սպաների ասամբլեայի անդամ է, որը, մասնավորապես, կոչ է արել «հատուկ գործողությունից» անցնել «ուկրաինական բանակի հետ լայնամասշտաբ պատերազմի»։