Միգրանտները պատրաստվում են լքել Ռուսաստանը ռուբլու արժեզրկումից հետո

Աշխատանքային միգրանտների մինչև մեկ երրորդը կարող է լքել Ռուսաստանը դոլարի և եվրոյի նկատմամբ ռուբլու փոխարժեքի անկման պատճառով, ինչը հանգեցրել է նրանց եկամուտների նվազման։ «Վեդոմոստի»-ին այս մասին ասել է Մոսկվայում ուզբեկական սփյուռքի ղեկավար Բահրոմ Իսմայիլովը։

Նա մեջբերել է ուզբեկական սփյուռքի ներկայացուցիչների շրջանում հարցումը, որը ցույց է տվել, որ հարցվածների 50%-ը մտածում է Ռուսաստանից հեռանալու մասին, 25%-ը չի ծրագրում դա անել, ևս 25%-ը դեռ չի կողմնորոշել։ Հարցմանը, ընդհանուր առմամբ, մասնակցել է 22,800 մարդ։

Դոլարի փոխարժեքի աճի շնորհիվ միգրանտների եկամուտները Ռուսաստանում ավելի ու ավելի համեմատելի են դառնում միգրանտների երկրների ներսում եկամուտների հետ, նշում է Իսմայիլովը։ Նրա խոսքով՝ աշխատանքային միգրանտների արտահոսքը, ամենայն հավանականությամբ, հիմնականում տեղի է ունենում ամենաքիչ վարձատրվող ոլորտներում` մանրածախ առևտուր, հասարակական սննդի ոլորտում ծառայություններ, մաքրություն, առաքումներ և գյուղատնտեսություն:

Բացի եկամուտների նվազումից՝ միգրանտներն իրենց վաստակի մի մասը կորցնում են հայրենիք գումար ուղարկելիս, քանի որ փոխանակումը տեղի է ունենում ստացող երկրի տեղական փոխարժեքով, ասել է Ռուսաստանում տաջիկների միության նախագահ Աբդուլլո Դավլաթովը՝ հավելելով, որ աճում է միգրանտների վերակողմնորոշումը դեպի այլ երկրներ։

Այսպիսով, օրինակ, Տաջիկստանի քաղաքացիների համար այժմ կա 15 երկիր, որ կարող են ընտրել գումար վաստակելու համար: Եթե նախկինում ամենահայտնի ուղղությունները Ռուսաստանն ու Ղազախստանն էին, ապա այժմ Հարավային Կորեան և Մեծ Բրիտանիան են, որտեղ տաջիկները գնում են գյուղատնտեսական սեզոնն անցկացնելու։