Սեյրան Օհանյանի նկատմամբ «ՁորաՀԷԿ»-ի գործով  քրեական հետապնդումը դադարեցվել է

Պաշտպանության նախկին նախարար Սեյրան Օհանյանի նկատմամբ «ՁորաՀԷԿ»-ի գործով քրեական հետապնդումը դադարեցվել է։ Այս մասին Factor.am-ի հետ զրույցում ասաց Օհանյանի փաստաբան Կարեն Մեժլումյանը։ Փաստաբանի խոսքով՝ հետապնդումը դադարեցվել է այն հիմքով, որ Օհանյանը չի կատարել իրեն մեղսագրվող արարքը։

Նշենք, որ Քրեական դատավարության օրենսգրքի 12-րդ հոդվածի 1-ին մասի 1-ին կետի համաձայն՝ Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե անձը չի կատարել իրեն մեղսագրվող արարքը։

Սեյրան Օհանյանը մեզ հետ զրույցում ասաց, որ իրենք ի սկզբանե պնդել են, որ մեղադրանքն անհիմն է, և դատախազությունը, փաստորեն, այժմ դադարեցրեց իր նկատմամբ հետապնդումը։

Հիշեցնենք, որ «ՁորաՀԷԿ»-ի գործով Սեյրան Օհանյանը մեղադրվում էր առանձնապես խոշոր չափերի վատնում կատարելու մեջ։ Գործով  հսկող դատախազ Ա․ Մուրադյանի կողմից  Օհանյանի նկատմամբ քրեական հետապնդումը դադարեցնելու որոշումը կայացվել է օգոստոսի 10-ին։

Գործը հարուցվել է շուրջ 4 տարի առաջ։ Գործի վերաբերյալ Դատախազության տարածած հաղորդագրության համաձայն՝ «Պաշտպանության նախարարության կազմում գտնվող և ռազմավարական նշանակություն ունեցող օբյեկտներից մեկը` «ՁորաՀԷԿ»-ը 2010 թվականին օտարվել է շուկայականից մի քանի անգամ էժան գնով։ Ընդ որում, իրավապահները հայտարարում էին, որ հանցավոր գործընթացն իրականացվել է փուլային, մանրամասն ծրագրված եղանակով։ Նախ` ՀԷԿ-ի արտադրած էլեկտրաէներգիայի սակագինն է նվազեցվել, արդյունքում` ընկերությունը շուրջ մեկ տարի գործել է առանց շահույթի, ինչն էլ հիմք է տվել այն օտարել շուկայականից անհամեմատ ցածր գնով»։

Փաստաբան Կարեն Մեժլումյանը մեզ հետ զրույցում ասաց, որ թեև Սեյրան Օհանյանի նկատմամբ հետապնդումը դադարեցվել է՝ գործի քննությունը շարունակվում է։

Արաքս Մամուլյան