24.11.2024 | 21:00
«Կանաչ» հիմնադրամներից շատերն այնքան էլ կանաչ չեն. ապաքաղաքական զրույց Ինգա Զարաֆյանի հետ․ ՏԵՍԱՆՅՈՒԹ
Ուկրաինացի զինվորականները «որոշակի հաջողության» են հասել Դոնեցկի մարզում․ Մալյար
Քաղաքականություն
14.08.2023 | 17:08
Ուկրաինայի պաշտպանության փոխնախարար Աննա Մալյարը հայտնել է, որ ուկրաինացի զինվորականներն ազատագրել են 3 քառակուսի կմ Բախմուտի ուղղությամբ։ Նրա խոսքով՝ Բախմուտի ուղղության հարավային թևում, ընդհանուր առմամբ, արդեն ազատագրվել է 40 քառակուսի կմ տարածք, գրում է BBC-ի ռուսական ծառայությունը։
Մալյարը նաև նշել է, որ Ուկրաինայի զինված ուժերը «որոշակի հաջողությունների» են հասել Ուրոժայնոյեի շրջանում։ Այնտեղ շարունակվում են ծանր մարտերը։ Նախօրեին տելեգրամյան ալիքները գրել էին, որ Ուկրաինայի զինված ուժերին հաջողվել է մուտք գործել գյուղի հյուսիսային հատված և դիրքերն ամրացնել կենտրոնական հատվածի հետ սահմանին, իսկ բնակավայրի հարավային հատվածը շարունակում է մնալ ռուս զինվորականների վերահսկողության տակ։
Telegram-ալիքներում տեղեկություններ են տարածվել, որ ռուս զինվորականներն արդեն լքել են Ուրոժայնոյեն, սակայն BILD-ի փորձագետ Յուլիան Ռոպկեն երկուշաբթի հայտնել է, որ այդ տարածքում մարտերը շարունակվում են։
Միաժամանակ, Ռուսաստանի ՊՆ-ն կիրակի հայտարարել է, որ «ուկրաինացի զինվորականները շարունակում են հարձակման փորձերը Ուրոժայնոյեի և Ստարոմայորսկու ուղղությամբ»։
Օգոստոսի 12-ին New York Times-ն էլ հայտնել էր, որ ուկրաինական բանակը «մարտավարական նշանակալի» առաջընթաց է գրանցել հակահարձակման ժամանակ։ Հրատարակության համաձայն՝ Ուկրաինան հազարավոր զինվորների, այդ թվում՝ իր ամենափորձառու ծովայիններին և զրահամեքենաներ է ուղարկել Մոկրիե Յալի գետի հովտի երկայնքով դեպի հարավ առաջխաղացման համար:
