Կապիտալ շինարարությունն այսօր մեր տնտեսության ամենատեսանելի և առաջ մղող ուժն է. վարչապետ

Վարչապետ Նիկոլ Փաշինյանն այսօր մասնակցել է Շինարարի օրվա առթիվ կազմակերպված միջոցառմանը:

Միջոցառմանը ներկա են եղել նաև ՀՀ փոխվարչապետ Տիգրան Խաչատրյանը, Քաղաքաշինության կոմիտեի նախագահ Արմեն Ղուլարյանը, փոխքաղաքապետ Տիգրան Ավինյանը, Հայաստանի շինարարների միության նախագահ Գագիկ Գալստյանը, օրենսդիր և գործադիր մարմնի պաշտոնյաներ, շինարարության ոլորտի ներկայացուցիչներ:

Կառավարության ղեկավարը նախ շնորհավորել է բոլորին Շինարարի օրվա առիթով և նշել. «Կապիտալ շինարարությունն այսօր մեր տնտեսության ամենատեսանելի և առաջ մղող ուժն է: Նախորդ տարվա համեմատ ունենք 17 տոկոս աճ: Բայց խնդիրն այն է, որ այդ աճի պատվերն ավելի մեծ է և պոտենցիալն ավելի մեծ է, որովհետև շատ ճիշտ նշվեց և, ըստ էության, շինարարության խթանման հիմնական գործիքն այն քաղաքականությունն է, որը վարում է կառավարությունը և՛ պետական, և՛ մասնավոր հատվածում, որովհետև, այո, պետական հատվածում մենք ունենք 300 դպրոցի և 500 մանկապարտեզի, տարեկան 500 կմ ավտոճանապարհի, 50 բժշկական կենտրոնի նախագծերը, բայց այսօր ասվել է արդեն, որ երկրում 55 000 բնակարան շինարարության տարբեր փուլերում է: Եվ ուզում եմ ընդգծել, որ դրանում էական նշանակություն ունի այն փաստը, որ մենք նախորդ տարվա տվյալներով մոտավորապես 35 մլրդ դրամ եկամտային հարկի գծով վերադարձրել ենք քաղաքացիներին, որոնք դա օգտագործում են հիփոթեքային վարկի սպասարկման համար, որով էլ հիմնականում խթանվում է շինարարությունը:

Իհարկե, ես ուզում եմ շնորհակալություն հայտնել բոլոր այն մեր շինարարական կազմակերպություններին, ովքեր իրականացնում են կառավարության ծրագրերը, որովհետև մենք տալիս ենք գումարը, բայց դա մի ժամանակ էր, որ մեզ թվում էր, որ գումարն ամենամեծ պրոբլեմն է: Հիմա պարզվում է, որ գումարն ընդհանրապես պրոբլեմ չի: Պրոբլեմն այդ գումարն արդյունավետ ծախսելն է և դրա դիմաց արժեք ստանալը՝ մնայուն, որակյալ արժեք ստանալը: Այս առումով, իհարկե, նկատելի է նաև ոլորտում ներդրումների աճը: Եվ վիզուալ փոփոխություններ կան նաև, օրինակ՝ Հայաստանի Հանրապետությունում այնպիսի շինարարական տեխնիկա կա, որ մենք մի ժամանակ միայն ֆիլմերում էինք տեսնում կամ արտերկրում:

Բայց մյուս կողմից՝ պիտի նաև ընդգծենք, որ մենք նոր խնդիրներ պետք է դնենք մեր առաջ, որովհետև, եթե շինարարությունը՝ որպես ամբողջություն, չդառնա ինդուստրիա, մենք խնդիր կունենանք մեր մակրոծրագրերն իրականացնելու առումով: Շատ կարևոր է, որ մենք իրար հետ այդ խնդիրը ձևակերպենք, որ շինարարությունը Հայաստանի Հանրապետությունում դառնա ինդուստրիա»:

Վարչապետը խոսել է նաև որակի կարևորության մասին. «Ընդհանրապես, եթե վերցնենք ամպլիտուդի առումով՝ ստեղծարար մասնագիտությունների առումով՝ մի բևեռում դիտարկվում է, օրինակ, ոսկերչությունը, մյուս բևեռում՝ դիտարկվում է, օրինակ, շինարարությունը: Եվ սա նաև ինչ-որ առումով մեզ համար լեզվամտածողության նշանակություն ունի, որովհետև մենք ընկալում ենք, որ ոսկերչությունը շատ նուրբ գործ է, շինարարությունը՝ ոչ այնքան: Ես կուզենամ, որ մենք այս ամպլիտուդն առնվազն նեղացնենք, որովհետև երկրի զարգացման մասին վկայող նշանն այն չէ, որ շենք բարձրացել է, թե չի բարձրացել, ճանապարհ ասֆալտապատվել է, թե չի ասֆալտապատվել: Զարգացման նշանն այն է, թե ոսկերչության հետ ինչ առնչություն ունի, քանի կիլոմետր է ոսկերչությունից հեռու: Մեզ պետք է, որ այդ կիլոմետրերը չլինեն, որովհետև, այո, մենք այսօր տեսնում ենք շենքեր, բայց շատ հաճախ չենք տեսնում էսթետիկա, մենք երբեմն տեսնում ենք էսթետիկա, չենք տեսնում որակ, երբեմն տեսնում ենք որակ, չենք տեսնում տեմպ և այսպես շարունակ:

Ինչո՞ւ եմ կարևորում այս օրը և ի՞նչ ուղերձով եմ եկել, բացի շնորհավորանքներից և շնորհակալություններից: Ես այն ուղերձով եմ եկել, որ իսկապես երկրի ռազմավարական զարգացման մասին ենք խոսում՝ շինարարական նոր կուլտուրայի, նոր որակի, նոր չափանիշների, նոր մոտեցումների, նոր տեմպերի մասին: Մեզ մոտ օրինակ շենք ապամոնտաժելը տարիներ է տևում: Հիմա մենք մի ծրագիր ենք իրականացնում՝ Պաշտպանության նախարարության հայտնի նախկին շենքը, որ պետք է ապամոնտաժվի, որ մեծ պետական ծրագիր պիտի իրականացնենք, բայց չորս տարի է այդ շենքը մենք քանդում ենք: Այստեղ և՛ մասնավոր ոլորտի, և՛ պետական ոլորտի խնդիր է: Էլ չեմ ասում՝ հայտնի չի, թե ինչքան ժամանակում այդ շենքը կկառուցենք: Իսկ ժամանակակից աշխարհում մեզ համար համեմատության ուրիշ չափանիշներ պետք է դնենք: Մենք այսօր ինտերնետում, փառք Աստծո ինտերնետը կա, տեսնում ենք՝ շենքը օրերի ընթացքում վերացավ, օրերի ընթացքում կանգնեց: Այս նույն պրոցեսը մեզ մոտ տևում է տարիներ: Այստեղ է մեր պրոբլեմը, և կարծում եմ, որ մենք պետք է տրամադրվենք, որովհետև գիտեք, շինարարությունն էլ, ինչպես բոլոր ոլորտները, հիմա սրանից դուրս ոլորտ չկա, առաջին հերթին, ինտելեկտուալ ոլորտ է, սկսած՝ կազմակերպչական աշխատանքից, նախագծման աշխատանքից, իրականացման պրոցեսում: Մենք այդքան փորձեցինք նաև տեխնիկական հսկողության գները բարձրացնել, որ տեխնիկական հսկողությունը դառնա իրական գործոն, բայց պետք է խոստովանենք, որ մինչև այսօր դա մեզ չի հաջողվում ամենատարբեր հանգամանքների բերումով:

Բայց ես ուզում եմ, որ այսօր մենք տոնն ընդգծելով, շնորհակալություն հայտնելով՝ խոնարհում հայտնենք բոլոր շինարարներին, որովհետև երկրի զարգացման տեմպը նրա մասին է, թե ինչ շինարարություն կա. կապ չունի՝ ցանկացած ոլորտում զարգացումն արտահայտվում է շինարարությամբ: Բարձր տեխնոլոգիական ոլորտը զարգանում է, թե չի զարգանում, մենք դա տեսնում ենք՝ համապատասխան շինարարություն կա, թե չէ, որովհետև օֆիսային տարածքներ են պետք և այդպես շարունակ: Կրթությունը զարգանում է. մենք հիմա նոր ծրագիր ենք անում՝ Ակադեմիական քաղաքի շինարարության ծրագիրը, որն էլի ահռելի մեծ շինարարական պոտենցիալի անհրաժեշտություն է ունենալու: Եվ մենք հիմա պիտի անկեղծ ասեմ՝ մեր լարվածությունը հասել է այն կետի, որ մենք մեզ հարց ենք տալիս, իսկ մեր շինարարական ոլորտը կկարողանա՞ այդ պետական պատվերներն իրականացնել, թե չէ: Մանավանդ, որ ասում եմ՝ 55 000 բնակարան կառուցման մեջ, և սա մի ահռելի խնդիր է, որը մենք պետք է ինչ-որ ձևով լուծենք: Իհարկե, այստեղ ամենևին էլ վատ չէ, որ նաև այլ երկրներից շինարարական ընկերություններ գան Հայաստանում գործեն, բայց նպատակը մենք պետք է ձևակերպենք հետևյալ կերպ՝ Հայաստանում պետք է շինարարական ինդուստրիա ձևավորվի»:

Նիկոլ Փաշինյանի խոսքով, ի տարբերություն ուղղակի շինարարության, շինարարական ինդուստրիան այն է, երբ խնդիրը դրվում է և աչքի առաջ իրականացվում է. «Այստեղ էլ է մտածողության փոփոխություն պետք, և ես շատ ուրախ եմ, որ դահլիճում տեսնում եմ նաև շատ փորձառու շինարարների, ովքեր տասնյակ տարիներ զբաղված են եղել ոլորտում և հայտնի են իրենց ձեռքբերումներով, բայց նաև շատ երիտասարդների եմ տեսնում, և այս փորձի և էներգիայի սիներգիան պետք է բերի մեզ այն արդյունքների, որ մենք ակնկալում ենք: Եվ, իրոք, խոսքը երկրի զարգացման մասին է: Շինարարությունն այդ առումով նշանային է, որովհետև չի կարող լինել երկիր, որը մեծ տեմպերով զարգանում է, և այնտեղ նոր շենքեր, նոր տներ, նոր բնակավայրեր չեն գոյանում»:

Կառավարության ղեկավարն անդրադարձել է նաև սահմանամերձ գյուղերում բնակարանների շինարարության ծրագրին և ընդգծել, որ կարևոր տարրն այդ ծրագրում այն է, որ շինարարությունը պետք է իրականացվի լիցենզավորված կազմակերպության կողմից, քանի որ կառավարությունը համոզված է, որ քաղաքաշինությունը շատ կարևոր նշանակություն ունի մտածողության ձևավորման համար: «Ես հույս ունեմ, որ մենք այս խնդիրն իսկապես կկարողանանք իրականացնել և ուզում եմ շնորհակալություն հայտնել բոլոր այն շինարարներին, ովքեր այս սկզբունքով առաջնորդվել են, նրանց, ովքեր պատրաստ են առաջնորդվել այս սկզբունքով: Հիմա ինձ համար ակնհայտ է, որ փողը, պետական ներդրումը և ոչ պետական ներդրումները հոսելու են ոլորտ: Մնում է, որ շինարարական կազմակերպությունները, ոլորտներն այդ հոսքը կարողանան կառավարել և այդ հոսքը կարողանան վերածել երկարաժամկետ արդյունքի:

Կրկին շնորհակալ եմ բոլորիդ կատարված շինարարության համար և շնորհավորում եմ բոլորիդ Շինարարի օրվա առիթով այն համոզմունքով, որ շինարարության, կառուցման այս տեմպը, զարգացման տեմպը պիտի պահպանենք, ավելացնենք և որակական նոր հաջողությունների հասնենք»,- եզրափակել է վարչապետը:

Հաջորդիվ Նիկոլ Փաշինյանը հանձնել է մասնագիտական տոնի առթիվ շինարարության բնագավառում նշանակալի գործունեության ծավալած մի խումբ շինարարների շնորհված պետական պարգևները: Մասնավորապես՝ քաղաքաշինության զարգացման գործում ներդրած նշանակալի ավանդի համար Անանիա Շիրակացու մեդալով պարգևատրվել են «Բետոն» արտադրական կորպորացիայի նախագահ Դավիթ Կլեկչյանը և «ՀԱԷԿ-ի շինարարություն» ընկերության տնօրեն Աշոտ Վարդանյանը։ Շինարարության զարգացման գործում ներդրած ավանդի համար ՀՀ վարչապետի հուշամեդալով պարգևատրվել են «Մետրոշին» ընկերության խորհրդի նախագահ Հրաչյա Մինասյանը, «Հայաստանի շինարարների միություն» ՀԿ և «Միդիս-Շար» ընկերության տնօրեն Գուրգեն Մինասյանը: Արդյունավետ և բարեխիղճ աշխատանքի համար ՀՀ վարչապետի շնորհակալագրով են պարգևատրվել «Օստ -Շին» ընկերության տնօրեն Ռոբերտ Օխանյանը, «Սնառտ» ընկերության տնօրեն Մարատ Թամամյանը։