11.08.2026 | 21:15
Չեմպիոնների լիգա․ «Արարատ-Արմենիայի» մեկնարկային կազմը «Ցելյեի» դեմ խաղում
Ամենայն Հայոց Կաթողիկոսն ընդունեց Բրազիլիայի հայոց թեմից մի խումբ երիտասարդների
12.07.2018 | 20:05
Հուլիսի 12-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Բրազիլիայի հայոց թեմի ուխտավորներին` ուղեկցությամբ թեմի առաջնորդ Գերաշնորհ Տ. Նարեկ եպիսկոպոս Բերբերյանի: Երիտասարդ ուխտավորները օրերս կայացած` «Դեպի Հայրենիք, դեպի Սուրբ Էջմիածին» համահայկական երիտասարդական հավաքի մասնակիցներից էին:
Ամենայն Հայոց Կաթողիկոսն ուրախությունն արտահայտեց Բրազիլիայի ազգասեր և եկեղեցանվեր զավակների` Հայաստան կատարած այցի առիթով: Իր հայրապետական սերն ու օրհնությունը բերելով երիտասարդներին` Վեհափառ Հայրապետը հույս հայտնեց, որ նրանք կապված կմնան Հայրենիքին ու Մայր Եկեղեցուն և իրենց ակտիվ ներգրավվածությամբ կշարունակեն զորացնել հայոց ազգային-հոգևոր կյանքը:
Նորին Սրբության հետ զրույցում երիտասարդները հաստատեցին, որ ոգևորված են երիտասարդական հավաքին մասնակցությունից և հայրենակիցների հետ ծանոթությունից, իսկ Հայրենիք ուխտագնացությունն իրենց համար նկատեցին մեծ փորձառություն:
Հուլիսի 4-ից 8-ը «Դեպի Հայրենիք, դեպի Սուրբ Էջմիածին» կարգախոսի ներքո Հայաստանում կայացավ համահայկական երիտասարդական հավաք, որին մասնակցեցին ավելի քան 20 երկրներից շուրջ 400 եկեղեցասեր երիտասարդներ, նրանցից 11-ը`Բրազիլիայի թեմից:
