Քաղաքականություն
10.08.2023 | 16:03
Լեհաստանը մտադիր է Բելառուսի հետ սահմանին 10,000 զինվորական տեղակայել։ Այս մասին հայտարարել է երկրի ՊՆ ղեկավար Մարիուշ Բլաշչակը, գրում է BBC-ի ռուսական ծառայությունը։
Նրա խոսքով՝ սահմանապահներին աջակցելու է 4,000 զինծառայող, ևս 6,000-ը լինելու է ռեզերվում։ Բլաշչակը նաև հայտարարել է, որ երկու տարվա ընթացքում Լեհաստանն ունենալու է Եվրոպայում ամենաուժեղ ցամաքային բանակը, եթե պաշտպանական ոլորտի հզորացումը շարունակվի։
«Ավելի լավ է գումար ծախսել լեհական բանակի, քան օտարերկրյա զորքերի վրա»,- ասել է նախարարը։
Այս շաբաթ լեհական սահմանապահները հազար զինվորի համալրման խնդրանքով են դիմել, սակայն երկու անգամ ավելի շատ զինվոր է ուղարկվելու։
Լեհաստանի իշխանություններն անհանգստացած են Բելառուսում ռուսական «Վագներ» մասնավոր ռազմական խմբավորման հայտնվելու կապակցությամբ, ինչպես նաև ունեն մտահոգություն, որ բելառուսական իշխանությունները դարձյալ անօրինական ներգաղթյալների խմբեր կուղարկեն սահման։
Էմմա Չոբանյան
