15.12.2025 | 17:20
«Լեսթերի» ֆուտբոլիստի գոլը 60 մետրից․ ՏԵՍԱՆՅՈՒԹ
Հավայան կղզիներում անտառային հրդեհները շուրջ 4 տասնյակ մարդու կյանք են խլել․ ԼՈւՍԱՆԿԱՐՆԵՐ
Քաղաքականություն
10.08.2023 | 16:07
Առնվազն վեց մարդ է զոհվել Մաուի կղզու հրդեհների հետևանքով, որը Հավայան արշիպելագի ամենամեծ կղզիներից է և հայտնի է զբոսաշրջիկների շրջանում, գրում է BBC-ի ռուսական ծառայությունը:
Հրդեհներն առաջանում են ինտենսիվ շոգից և երաշտի հետևանքով, իսկ կրակի արագ տարածմանը նպաստում է «Դորա» փոթորիկը, որը մոլեգնում է Խաղաղ օվկիանոսի կղզիներից հարյուրավոր կիլոմետրեր դեպի հարավ:
Շոգ եղանակը, որն այլ գործոնների հետ միասին առաջացել է մոլորակի կլիմայի փոփոխությամբ, այս ամառ հաստատվել է ԱՄՆ բազմաթիվ նահանգներում, ինչպես նաև Եվրոպայում և Ասիայում։
Հավայան կղզիներում անտառային հրդեհներն ավելի փոքր ծավալի են, քան Կալիֆորնիայում և ԱՄՆ-ի մայրցամաքի այլ նահանգներում, բայց տեղացիներն ասում են, որ նախկինում նման բան չեն տեսել:
«Ես չեմ ուզում դրամատիկ լինել, բայց չեմ կարծում, որ նման բան երբևէ տեղի է ունեցել Մաուիում։ Անսովոր է, որ հրդեհներն ընդգրկել են այդքան տարածք, դրանք ամբողջ կղզում են»,- AFP-ին ասել է սերֆինգի տեղական դպրոցի ղեկավարը:
Ավերածությունների մեծ մասը տեղի է ունեցել Լահայնա քաղաքում, որտեղ շատ շենքեր ավերվել կամ վնասվել են հրդեհի հետևանքով: ԱՄՆ առափնյա պահպանությունը հայտնել է, որ փրկել են 12 տեղացիների, ովքեր իրենց նետել են օվկիանոս՝ հրդեհներից փրկվելու համար:
Հրդեհների պատճառով հազարավոր մարդիկ մնացել են առանց էլեկտրաէներգիայի և հեռախոսային կապի, շատերը ստիպված են եղել տարհանվել։ Շուրջ 4,000 մարդ փորձում է լքել կղզին, որը զբոսաշրջության հայտնի վայր է:
Մի քանի հրդեհ է բռնկվել «Մեծ կղզում», որտեղ գտնվում է Հավայան կղզիների նահանգի մայրաքաղաք Հոնոլուլուն։
NBC News-ի հաղորդմամբ՝ հրդեհների հետևանքով առնվազն 36 մարդ է զոհվել, 11 հազար մարդ լքել է իր տունը։
