17.03.2026 | 17:54
Արտավազդ Քարամյանը հյուրընկալվել է «Փյունիկին»․ ԼՈՒՍԱՆԿԱՐ
Լաչինի միջանցքի վերաբերյալ Լիտվայի ԱԳ նախարարի հայտարարությունը Բաքվի դժգոհությունն է հարուցել
Քաղաքականություն
09.08.2023 | 17:13
Ադրբեջանի ԱԳՆ-ն անդրադաձել է Լաչինի միջանցքի շրջափակման և Արցախում ստեղծված աղետալի մարդասիրական իրավիճակի վերաբերյալ Լիտվայի ԱԳ նախարար Գաբրելիուս Լանդսբերգիսի հայտարարություններին։ ԱԳՆ խոսնակ Այխան Հաջիզադեն դիմելով Լիտվայի ԱԳՆ ղեկավարին՝ առաջարկել է Հայաստանին կոչ անել ավելի «կառուցողական մոտեցում ցուցաբերել» խաղաղության բանակցություններում։
«Տեղին կլինի Հայաստանին կոչ անել ավելի կառուցողական մոտեցում ցուցաբերել, քան խաթարել խաղաղության գործընթացը»,- ասել է Հաջիզադեն։
Նա նաև կոչ է արել չտրվել «հայկական քարոզչությանը» և կրկին հայտարարել, թե Լաչինի միջանցքը Հայաստանը չարաշահել է, ինչի համար էլ Ադրբեջանը միջանցքում ապօրինի անցակետ է տեղադրել, նաև առաջարկել է օգտագործել Ակնայի (Աղդամ) ճանապարհը։
Հիշեցնենք, որ Լիտվայի ԱԳ նախարար Գաբրելիուս Լանդսբերգիսն անդրադարձել էր ՀՀ ԱԳ նախարար Արարատ Միրզոյանի հետ այսօր տեղի ունեցած հեռախոսազրույցին ու թվիթերյան գրառմամբ մտահոգություն հայտնել Արցախում հումանիտար իրավիճակի առնչությամբ։
«Խոսեցի ՀՀ ԱԳ նախարար Արարատ Միրզոյանի հետ, մտահոգություն հայտնեցի Լաչինի միջանցքի արգելափակման սարսափելի մարդասիրական հետևանքների վերաբերյալ։ Չափազանց կարևոր է ապահովել անարգել տեղաշարժը, ինչպես կարգադրել է Արդարադատության միջազգային դատարանը։ Վերահաստատեցի հաստատակամ համոզմունքը համապարփակ և կայուն խաղաղության ուղղությամբ աշխատելու բացարձակ անհրաժեշտության վերաբերյալ»,- գրել էր Լիտվայի ԱԳ նախարարը թվիթերյան իր էջում։
Էմմա Չոբանյան
