Փաշինյանը՝ քաղաքապետի թեկնածու Հայկ Մարությանի մասին․ ՔՊ-ի մոտեցումը նախկինում և հիմա․ ԵզրաԿԱՑՈՒԹՅՈՒՆ

Երևանի նախկին քաղաքապետ Հայկ Մարությանը երեկ հայտնեց ավագանու ընտրություններին մասնակցելու որոշման մասին։

2018-2021 թվականներին Երևանը ղեկավարած Մարությանին ավագանու «Իմ քայլը» դաշինքը 44-օրյա պատերազմից մոտ մեկ տարի անց պաշտոնանկ արեց՝ պատճառաբանելով, թե պատերազմից հետո Մարությանի և ավագանու կազմի աշխատանքային հարաբերություններում ճգնաժամային վիճակ էր, չէր ստացվում նաև Կառավարության հետ աշխատանքը։ Մինչդեռ, ըստ մամուլի հրապարակումների, Նիկոլ Փաշինյանը չներեց Հայկ Մարությանին արցախյան երկրորդ պատերազմից հետո կուսակցությունից դուրս գալու, իսկ 2021 թվականի արտահերթ ընտրություններին «Քաղաքացիական պայմանագրին» չաջակցելու համար։

Երեկ, երբ Մարությանը հայտնեց քաղաքապետի պաշտոնը կրկին ստաձնելու հավակնության մասին, համացանցի ֆեյսբուքյան տիրույթում հայտնվեցին իշխական շրջանակներից որոշ գրառումներ՝ ուղղված Մարությանի դեմ։ Իսկ վարչապետի աշխատակազմի ղեկավարի տեղակալ Տարոն Չախոյանը, որը Ֆեյսբուքում բավական ակտիվ գրառումներ է կատարում իշխանության ընդդիմախոսների վերաբերյալ, ընդ որում՝ հաճախ դրանք համեմելով վիրավորանք և ծաղր պարունակող բառապաշարով, երեկ Մարությանի հայտարարությունից հետո ֆեյսբուքյան էջում, առանց անուն հնչեցնելու, անդրադարձել էր Մարությանի՝ Երևանը ծաղկեցնելու խոստմանը՝ հեգնելով․ «Երևանը ծաղկեցնելու մտքով տարված անշարժ գույք են ձեռք բերում Չեխիայում: Պետք ա, բա պետք չի …»։

Չախոյանը, ըստ էության, ակնարկում է Չեխիայում Հայկ Մարությանի և կնոջ ունեցվածքը։ Մինչդեռ 2018 թվականին, երբ Նիկոլ Փաշինյանը խոսում էր Հայկ Մարությանին որպես քաղաքապետի թեկնածու առաջադրելու իրենց որոշման մասին, պնդում էր, թե Մարությանի թեկնածությունն ամենաշատն է համապատասխանում այն գաղափարախոսությանը, որ դրված էր հեղափոխության հիմքում։ Այն ժամանակ Փաշինյանը հայտարարում էր, թե Հայաստանում պետք է տեղի ունենա աշխատանքի, և ոչ թե պարապության քարոզչություն, իսկ Մարությանին Փաշինյանն այն ժամանակ համարում էր աշխատող մարդու խորհրդանիշ, որը սկզբունքային և առանց որևէ գործարքի հաջողությունների է հասել կյանքում։

Մանրամասները՝ տեսանյութում։

Շողիկ Գալստյան