16.01.2026 | 15:30
Պետությունը չի սուբսիդավորի սոցփաթեթի շահառուների 6000 դրամը․ ՏԵՍԱՆՅՈՒԹ
Ֆինլանդիան արգելել է Yandex-ին հաճախորդների տվյալները փոխանցել ՌԴ-ին
Քաղաքականություն
08.08.2023 | 19:32
Ֆինլանդիայի տվյալների պաշտպանության վարչությունը հայտարարել է, որ Yandex խմբին և նրա հոլանդական գործընկեր Ridetech International-ին արգելել է Yango տաքսի հավելվածի հաճախորդների անձնական տվյալները փոխանցել Ռուսաստանին, գրում է VOA-ն։
«Ֆինլանդիայի տվյալների պաշտպանության մարմինը (DPA) տեղեկացել է օրենսդրական բարեփոխման մասին, որն ուժի մեջ կմտնի Ռուսաստանում սեպտեմբերի սկզբին, համաձայն որի՝ ՌԴ ԱԴԾ-ն իրավունք կունենա ստանալ տաքսիների շահագործման ընթացքում մշակված տվյալները»,- ասված է կարգավորիչի հայտարարության մեջ։
Ֆինլանդիայի իշխանությունները հանգել են եզրակացության, որ Yango-ն չի կարողանա պաշտպանել անձնական տվյալները ԵՄ օրենսդրության պահանջներին համապատասխան։
Yango տաքսի ծառայությունը գործում է 14 երկրներում, այդ թվում՝ Ֆինլանդիայում և Նորվեգիայում։ Ֆինլանդիայի կարգավորող մարմինն (DPA) ասել է, որ իր որոշումը ժամանակավոր է և ի սկզբանե ուժի մեջ է եղել երեք ամսով, քանի որ որոշումն ընդունվել է ԵՄ տվյալների պաշտպանության ընդհանուր կանոնակարգի (GDPR) հրատապ ընթացակարգով:
Yango-ի տեղեկությունների համաձայն՝ տաքսի ծառայության անձնական տվյալները մշակվում են Ridetech International B.V.-ի կողմից Նիդերլանդներում, որը Yango հավելվածների ծառայությունների մատակարարն է ԵՄ-ում: Ավելին, Yango-ի տեղեկատվության համաձայն՝ ընկերությունը անձնական տվյալները փոխանցում է Ռուսաստանին։
Yango տաքսի ծառայությունը հաճախ անվանում են «ռուսական Google»: Հունիսին մոսկովյան դատարանը Yandex-ին տուգանել է 2 միլիոն ռուբլով (20,810 դոլար)՝ Ռուսաստանի ԱԴԾ-ին իր օգտատերերի մասին տեղեկատվություն տրամադրելուց բազմիցս հրաժարվելու համար:
Անցյալ տարվա օգոստոսին Ֆինլանդիայի իշխանությունները բռնագրավել են Yandex-ի ակտիվները երկրում, ներառյալ ընկերության միակ տվյալների կենտրոնը Ռուսաստանից դուրս, այն բանից հետո, երբ ընկերության հիմնադիր և նախկին գործադիր տնօրեն Արկադի Վոլոժը ներառվեց Եվրամիության պատժամիջոցների ցուցակում:
