Թուրքիայում ձերբակալել և Բաքվին են հանձնել ադրբեջանցի գիտնականին, որին կասկածում են գյունելական շարժման հետ կապերի համար

Թուրքիայում ձերբակալվել և Ադրբեջան է տարվել գիտնական-տնտեսագետ Ֆազիլ Գասիմովը, որին թուրքերը մեղադրում են գյուլենական FETÖ շարժման հետ կապերի համար։ Պաշտոնական տվյալներով՝ Գասիմովը ձերբակալվել է ադրբեջանցի ընդդիմադիր գործիչ, տնտեսագետ Գուբադ Իբադօղլուի գործով, հաղորդում են ադրբեջանական լրատվամիջոցները։

«Քրեական գործով հետախուզման մեջ գտնվող Ֆազիլ Գասիմովը ձերբակալվել է ՆԳՆ-ի կողմից և տարվել Ադրբեջան ու հանձնվել հետաքննությանը»,- ասվում է ՆԳՆ մամուլի ծառայության հաղորդագրության մեջ։

Գասիմովի եղբայրը՝ Նազիմ Գասիմովը լրատվամիջոցներին պատմել է, որ նրան տարել են տնից, որտեղ բնակվում էր։

«Ի՞նչ պատճառով են նրան ձերբակալել՝ տեղեկություն չի տրամադրվել։ Սոցցանցերից տեղեկացանք, որ Ֆազիլին Բաքու են բերել։ Սակայն ձերբակալման պատճառը մեր ընտանիքին չի բացատրվել, պետական ​​կառույցներում նրա մասին տեղեկություն ստանալ չենք կարող»,- պատմել է եղբայրը։

Գասիմովը սովորել է Թուրքիայում՝ Ստամբուլի համալսարանում, իրավագիտության և տնտեսագիտության դոկտոր է։

Գուբադ Իբադօղլուի փաստաբան Բահրուզ Բայրամովն իր հերթին նշել է, որ մինչ այժմ Ադրբեջանում ոչ ոք քրեական հետապնդման չի ենթարկվել FETÖ-ին առնչություն ունենալու համար։ Նա ասել է, որ ոչինչ չգիտի Գասիմովի՝ Իբադօղլուի գործում ներգրավվածության մասին։

Հավելենք, որ Իբադօղլուն ձերբակալվել է հուլիսի 23-ին, նրա գրասենյակում խուզարկություն է իրականացվել։ Սկզբում Ադրբեջանի ՆԳՆ մամուլի ծառայությունից հայտնել էին, որ Թուրքիայի ՆԳՆ-ից ստացված տեղեկատվության հիման վրա գործողություն է իրականացվել գյուլենական FETÖ շարժման հետ կապ ունեցող անձանց նկատմամբ։ Հինգ ձերբակալվածներից մեկը ցուցմունք էր տվել Իբադօղլուի հետ իր կապերի մասին։ Այնուհետև գործչին մեղադրանք էր առաջադրվել Քրեական օրենսգրքի 204.3.1 հոդվածքով (կեղծ փողերի կամ արտարժույթի ձեռքբերում կամ վաճառք որպես կազմակերպված խմբի կազմում): Այս հոդվածով նրան սպառնում է 8-ից 12 տարվա ազատազրկում։ Դատարանը նրա նկատմամբ խափանման միջոց է ընտրել 3 ամիս 26 օր ժամկետով կալանավորումը։ Իբադօղլուն հայտարարել է, որ իրեն կալանավորել են Ադրբեջանի նախագահ Իլամ Ալիևի պատվերով։

Հավելենք, որ ԱՄՆ-ն ու ԵՄ-ն, ինչպես նաև միջազգային մի շարք իրավապաշտպան կազմակերպություններ կոչ են արել Ադրբեջանի իշխանություններին հարգել Իբադօղլուի իրավունքներն ու ազատ արձակել նրան։

Էմմա Չոբանյան