24.11.2024 | 19:08
ՃՏՊ Դիմիտրով գյուղի մոտ. 3 անձ տեղափոխվել է հիվանդանոց
Պուտինը Թուրքիա կայցելի օգոստոսի վերջին․ Էրդողանի հետ քննարկումների օրակարգում կլինեն նաև Հայաստան-Թուրքիա-Ադրբեջան հարաբերությունները
Քաղաքականություն
07.08.2023 | 12:42
Թուրքական Hurriyet-ը հայտնում է, որ ՌԴ նախագահ Վլադիմիր Պուտինի այցը Թուրքիա նախատեսված է օգոստոսի վերջին։ Մասնավորապես, լրագրող Աբդուլքադիր Սելվին գրում է, որ սպասվում է, որ Պուտինը Թուրքիա է այցելելու օգոստոսի վերջին շաբաթվա ընթացքում։ Միաժամանակ, ըստ հրապարակման, Թուրքիայի նախագահ Ռեջեփ Թայիփ Էրդողանը Պուտինի հետ հանդիպումից հետո մեկնելու է ԱՄՆ՝ մասնակցելու ՄԱԿ-ի Գլխավոր վեհաժողովի նիստին։
Հոդվածագիրը նաև ներկայացնում է հարցերը, որոնք լինելու են Էրդողանի ու Պուտինի քննարկումների օրակարգում։ Մասնավորապես, հացահատիկային միջանցքը, երկու երկրների առևտրային հարաբերությունները, Սիրիայի հարցը, այսպես կոչված, «Զանգեզուրի միջանցքն» ու Թուրքիա-Ադրբեջան-Հայաստան հարաբերությունները։
Հավելենք, որ ուրբաթօրյա աղոթքից հետո Էրդողանը կրկին խոսել էր Պուտինի այցի մասին։
«Ժամկետը դեռ պարզ չէ։ Բայց մեր արտգործնախարարը, հետախուզության ղեկավարը՝ բոլորը բանակցում են։ Կարծում եմ, որ այս այցը տեղի կունենա օգոստոսին»,- ասել էր Էրդողանը։
Օրերս տեղի էր ունեցել նաև Պուտինի և Էրդողանի հեռախոսազրույցը։ Թուրքական կողմը զրույցի վերաբերյալ տարածած հաղորդագրության մեջ նշել է, որ պայմանավորվել են Պուտինի Թուրքիա այցի շուրջ։ Ավելի վաղ Էրդողանը մի քանի անգամ հայտարարել էր, որ օգոստոսին սպասվում է Վլադիմիր Պուտինի այցը Թուրքիա։ Սակայն ռուսական կողմն այս մասին չի շտապում հայտարարել։ Հեռախոսազրույցի մաին ռուսական կողմի հաղորդագրության մեջ ասվում է, որ երկու ղեկավարները պայմանավորվել են «շարունակել շփումները տարբեր մակարդակներում, այդ թվում՝ հնարավոր հանդիպման նախապատրաստման համատեքստում»։
Էմմա Չոբանյան
