06.06.2026 | 16:10
Դատախազությունը զգուշացնում է՝ վարժական հավաքից խուսափելը հանցագործություն է. այն պատժվում է 1-3 տարի ժամկետով ազատազրկմամբ
Հրթիռակոծության հետևանքով վնասվել են Ղրիմը Խերսոնի շրջանի հետ կապող երկու կամուրջները
Քաղաքականություն
07.08.2023 | 12:19
Ուկրաինացի զինվորականների կողմից հրթիռակոծության հետևանքով կիրակի կեսօրին ռուսական զորքերի կողմից գրավված տարածքներում վնասվել են բռնակցված Ղրիմը մայրցամաքի հետ կապող երկու կամուրջները։ Այս մասին հայտարարել են Ռուսաստանի կողմից նշանակված Ղրիմի իշխանությունները։
Համացանցում հրապարակվել են հարվածների հետևանքներիը պատկերող լուսանկարներ ու տեսանյութեր։ Դատելով դրանցից՝ կամուրջների վրայով անցումն այժմ անհնար է կամ առնվազն լրջորեն խոչընդոտված, գրում է VOA-ն։
Ռուսաստանի կողմից նշանակված Խերսոնի շրջանային վարչակազմի ղեկավար Վլադիմիր Սալդոն նախ գրել է շրջանի հարավում գտնվող Գենիչեսկ քաղաքն Արաբատի հետ կապող կամրջի վնասման մասին։ Այնուհետև բռնակցված Ղրիմի ռուս ղեկավար Սերգեյ Ակսյոնովը գրել է մեկ այլ կամրջի՝ Չոնգարսկու վնասվելու մասին, որը Խերսոնի շրջանն ուղղակիորեն կապում է Ղրիմի հետ։
Զոհերի մասին չի հաղորդվում, Սալդոն գրում է մեկ տուժածի մասին։
Ուկրաինայի Զինված ուժերի ռազմավարական հաղորդակցության վարչությունը հաստատել է Չոնգարսկի և Գենիչեսկի ավտոմոբիլային կամուրջներին հասցված հարվածները։Հայտարարվել է, որ խոսքը ռուսական զորքերի մատակարարման երկու առանցքային ուղիների մասին է։
Դատելով հրապարակված լուսանկարներից ու տեսանյութերից՝ կամուրջները չեն փլուզվել, սակայն ճանապարհահատվածը լրջորեն վնասվել է։
