07.10.2026 | 23:48
Արթուր Դանիելյանը կալանավորվեց
Նավալնին դատապարտվեց 19 տարվա ազատազրկման
Քաղաքականություն
04.08.2023 | 19:22
Մոսկվայի քաղաքային դատարանն օգոստոսի 4-ին հրապարակել է ընդդիմադիր գործիչ Ալեքսեյ Նավալնիի դեմ «ծայրահեղականության» գործով նոր դատավճիռը։ Նա դեպքերի համակցությամբ դատապարտվել է 19 տարվա ազատազրկման հատուկ ռեժիմի գաղութում։ 19 տարին այն ընդհանուր ժամկետն է, որը Նավալնին պետք է անցկացնի գաղութում՝ արդեն իսկ կայացված պատիժների հիման վրա, նշում է DW-ի ռուսական ծառայությունը։
Նա նախկինում դատապարտվել էր ինը տարվա ազատազրկման՝ խարդախության և դատարանի նկատմամբ անհարգալից վերաբերմունքի մեղադրանքով։
Նավալնիի հետ գործին ներգրավված է նրա շտաբի նախկին աշխատակից Դանիել Խոլոդնին։ «Մեդիազոնա»-ն գրում է, որ նա դատապարտվել է ազատազրկման ընդհանուր ռեժիմի գաղութում։ Մեղադրող կողմը պահանջել է Խոլոդնիին ազատազրկել 10 տարով։
Ալեքսեյ Նավալնին մեղադրվել է Քրեական օրենսգրքի վեց հոդվածներով յոթ դրվագներում՝ ծայրահեղական համայնք ստեղծելու, ծայրահեղականության հրապարակային կոչերի, քաղաքացիների իրավունքները ոտնահարող շահույթ չհետապնդող կազմակերպության ստեղծման, ֆինանսավորման համար, ծայրահեղական գործունեության, ինչպես նաև անչափահասների ներգրավումը վտանգավոր գործողություններում և նացիզմի վերականգնում: Այս դրվագների վերաբերյալ դատական գործընթացները սկսվել են 2023 թվականի մայիսին։
Դատավարությունն անցկացվել է դռնփակ, անգամ Նավալնիի ծնողներին թույլ չեն տվել մտնել դատարանի դահլիճ։ Գործը լսվել է Վլադիմիրի շրջանի Մելեխով գյուղի թիվ 6 ուղղիչ գաղութում արտագնա նիստերում, որտեղ ընդդիմադիրն իր պատիժը կրում է նախկին դատավճռով:
