Մարզից ԲԴԽ դատավոր անդամ չընտրելը կբերի բացասական հետևանքների. Գևորգ Գյոզալյան․ ՏԵՍԱՆՅՈՒԹ

«Խնդիր ունենք մարզից ԲԴԽ անդամ ընտրելու, սա շատ էական է, այս համամասնությունը անհիշելի ժամանակներից խախտվել է»,- այս մասին այսօր լրագրողների հետ զրույցում ասաց Վճռաբեկ դատարանի հակակոռուպցիոն պալատի դատավոր Գևորգ Գյոզալյանը:

Վկայակոչելով Դատական օրենսգրքի 76-րդ հոդվածի 1-ին մասը, դատավորը նկատեց, որ ըստ այդ կետի, ԲԴԽ դատավոր-անդամները պետք է ունենան մեկ անդամ Վճռաբեկ դատարանից, մեկ անդամ Վերաքննիչ դատարանից, 3 անդամ առաջին ատյանից, ընդ որում՝ առաջին ատյանի դատարանից մեկ անդամը պետք է մարզից լինի. «Եթե մենք մարզից չընտրենք, ապա այս այդ հոդվածը կշարունակի խախտված մնալ, ինչը բացասական հետևանքների կբերի»:

Անդրադառնալով հարցին, թե ինչու է Դատական դեպարտամենտը ծանուցումն ուղարկել մարզի միայն Սնանկության դատավորներին, Գևորգ Գյոզալյանը պատասխանեց. «Կարծում եմ, որ այդ ժամանակ Դատական դեպարտամենտը օրենքի խախտմամբ է ծանուցում ուղարկել և նա առնվազն պարտավոր էր այդ ժամանակ և դրանից ավելի վաղ ծանուցել մարզին, որովհետև մենք մարզից դատավոր չունենք»: Լրագրողներից մեկը հետաքրքրվեց՝ իր ներկայացրած տրամաբանությամբ, որ մարզային դատավորները պետք է ներկայացնեն և պաշտպանեն մարզային դատարանների շահերը, այդ դեպքում, ասենք, Երևանի քրեական դատարանի շահերն ո՞վ պետք է ներկայացնի:

Գևորգ Գյոզալյանը հակադարձեց՝ տվյալ դեպքում կա Երևանի ընդհանուր իրավասության դատարան: Իսկ ԲԴԽ-ում ներկայացված անձինք այդ դատարանների շահերը ներկայացնու՞մ են, թե՞ ոչ, հարցին նա ասաց, որ չի կարող պատասխանել, զուտ օրենքի տեսանկյունից է հարցին անդրադառնում:

Մանրամասները՝ տեսանյութում։