Տեղի է ունեցել Պուտինի և Էրդողանի երկար սպասված հեռախոսազրույցը․ ինչ հարցեր են քննարկվել

Տեղի է ունեցել Թուրքիայի նախագահ Ռեջեփ Թայիփ Էրդողանի ւ ՌԴ նախագահ Վլադիմիր Պուտինի հեռախոսազրույցը, որի մասին խոսվում էր շաբաթներ շարունակ։ Թուրքիայի նախագահականի տարածած հաղորդագրության համաձայն՝ կողմերը  պայմանավորել են Պուտինի Թուրքիայի այցի շուրջ, փոխանցում է TRT Haber-ը։

Էրդողանը շնորհակալություն է հայտնել անտառային հրդեհների դեմ պայքարի նպատակով ռուսական կողմի ուղարկած 2 հրշեջ ինքնաթիռների համար, գոհունակություն հայտնել ռուս զբոսաշրջիկների հետաքրքրության աճի կապակցությամբ և համոզմունք հայտնել, որ այս տարի զբոսաշրջության ոլորտում ռեկորդ է սահմանվելու։ Նա նաև կոչ է արել թույլ չտալ  քայլեր, որոնք կարող են տանել էսկալացիայի ռուս-ուկրաինական պատերազմում։

Թուրքիայի նախագահն ընդգծել է Սևծովյան հացահատիկային գործարքի կարևորությունը, որն անվանել է «խաղաղության կամուրջ»։ Նա ասել է, որ երկար ժամանակով դրա դադարեցումը կողմերից որևէ մեկի շահերին չի համապատասխանում։  Էրդողանը նշել է, որ Թուրքիան կշարունակի ինտենսիվ դիվանագիտական ջանքեր գործադրել Սևծովյան նախաձեռնության շարունակման համար։

Հավելենք, որ հացահատիկային գործարքի ժամկետը լրացել է հուլիսի 17-ին, և Մոսկվան հրաժարվել է երկարաձգել այն։

Սևծովյան  հացահատիկային գործարքը կնքվել է 2022 թվականի հուլիսի 22-ին ՄԱԿ-ի, Թուրքիայի, ՌԴ-ի և Ուկրաինայի միջև՝ Սև ծովի Ուկրաինայի նավահանգիստներով ուկրաինական հացահատիկի անվտանգ արտահանման համար։ Ստորագրումից ի վեր գործարքը մի քանի անգամ երկարաձգվել է։

Ռուսական կողմը հեռախոսազրույցի վերաբերյալ դեռևս պաշտոնական հաղորդագրություն չի տարածել։

Էմմա Չոբանյան