Էրդողանն իր կրտսեր որդուն՝ Բիլալին պատրաստում է որպես իր իրավահաջորդի․ անդրադարձ

Թուրքիայի նախագահ Ռեջեփ Թայիփ Էրդողանը մտահոգված է իր առողջական խնդիրներով և նախաձեռնել է կրտսեր որդուն՝ Նեջմեթթին Բիլալ Էրդողանին վերապատրաստելու պլաններ՝ իրեն փոխարինելու համար։ Այս մասին ասվում է Nordic Monitor-ի հետաքննող լրագրող Աբդուլլահ Բոզքուրտի անդրադարձում, որը վկայակոչում է Turkish Minute-ը։

Ըստ հրապարակման՝ Էրդողանը ձգտում է ստեղծել դինաստիա՝ ապամոնտաժելով ժողովրդավարական ինստիտուտները թույլ ընդդիմության և հարյուրավոր միլիարդ դոլարներ գնահատվող ընտանեկան հսկայական կարողություն կուտակելու ֆոնին։

Բոզքուրտը պնդում է, որ թեև Բիլալը ոչ մի պետական պաշտոն չի զբաղեցնում, համարվում է ամենաազդեցիկ անձը Թուրքիայի կառավարման մեջ՝ պնդելով, որ նա գործում է ստվերից՝ օգնելով հոր ռեպրեսիվ կառավարմանը և առանցքային կառավարական պաշտոնները զբաղեցրած ընկերների լայն ցանցին: Վերլուծությունը ցույց է տալիս, որ նախագահ Էրդողանի վերջին հիմնական նշանակումները և կաբինետի վերադասավորումները մատնանշում են պոտենցիալ ընտանեկան դինաստիայի ճանապարհային նշանները՝ ակնարկելով երկարատև կառավարման ցանկության մասին։

Լրատվամիջոցը գրում է, որ Բիլալ Էրդողանը, որը կրթություն է ստացել ԱՄՆ-ում, քաղաքական իսլամի գաղափարական մոլեռանդ է։ Նա սերտ կապեր է պահպանում կրոնական աղանդների և ցանցերի հետ, որոնք աջակցում են հոր իշխանությանը և քաղաքական օրակարգին:

Վերլուծության հեղինակը պնդում է, որ նա աշխատել է «Ալ-Քաիդայի» ֆինանսիստի հետ և որպես կասկածյալ է ճանաչվել կոռոուպցիայի հետաքննության մեջ, և նրան փրկել է միայն հոր միջամտությունը:

Անդրադարձում նաև նշվում է, որ Բիլալ Էրդողանը նշանակալի դեր է խաղում կառավարական առանցքային պաշտոնները համալրելու գործում այնպիսի հիմնադրամների միջոցով, ինչպիսին է TÜGVA-ն, որը հիմնված է քաղաքական իսլամի վրա և մտահոգություն է առաջացնում վարչակազմում քաղաքական իսլամի ազդեցության հետ կապված:

Նշվում է, որ նախագահ Էրդողանը միջոցներ է ձեռնարկել իր ղեկավարած «Արդարություն և զարգացում» կուսակցության ազդեցիկ դեմքերին հեռացնելու համար՝ ճանապարհ հարթելու որդու պոտենցիալ ժառանգության համար և ամրապնդելով իր  ընտանիքի ազդեցությունը թուրքական քաղաքականության մեջ։ Բոզքուրտը պնդում է, որ վերջին նշանակումները, ինչպիսին է Իբրահիմ Քալընի նշանակումը Ազգային հետախուզական կազմակերպության ղեկավարի պաշտոնում, աջակցում է Բիլալի հնարավոր ժառանգությանը:

Ըստ հրապարակման՝ Էրդողանների ընտանիքի ենթադրյալ հարստությունը, որը ձեռք է բերվել անօրինական ճանապարհով, կառավարվում է Բիլալի կողմից և «կրոնական շրջանակներում դա արդարացվում է որպես անհրաժեշտություն գլոբալ ջիհադիստական շարժումներին և իսլամիստական ռեժիմներին աջակցելու համար»։

Էմմա Չոբանյան